सिन्धुपाल्चोक ।
कोरोना भाइरस (कोभिड १९) लाई फैलन नदिन पूर्व तयारीका लागि इन्द्रावती गाउँपालिकाले ५० लाख रुपैयाँको कोष खडा गरेर भाइरस रोकथाममा जुटेको छ ।
कोरोना रोकथाम कोष नामाकरण गरि गाउँपालिकाले संक्रमण फैलन नदिन रोकथाममा जुटेको हो ।
नेपालमा कोरोना संत्रमण देखिनु अगावै गाउँपालिकाले आफ्नो क्षेत्रमा प्रवेश गर्नेहरुको स्वास्थ्य परीक्षण गरेर मात्रै प्रवेश दिन थालेको थियो ।
गाउँपालिकामा आफैसँग कोष खडा गर्न यो रकम पर्याप्त नभएकाले संघीय, प्रदेश र विभिन्न स्रोत जुटाएर कोषको सुरुवात गरिएको गाउँपालिकाका अध्यक्ष वंशलाल तामाङले जानकारी दिनुभयो ।
पालिकाका अनुसार यो रकम कोरोना रोकथामकै लागि खर्च गरिनेछ ।
गाउँपालिका राष्ट्रिय महासंघका महासचिवसमेत रहनु भएका इन्द्रावती गाउँपालिकाका अध्यक्ष तामाङले विभिन्न स्वास्थ्य सामग्री खरिद गर्नेदेखि संक्रमण फैलन नदिनका लागि पूर्व तयारीका लागि कोषको रकम खर्च गरिने जानकारी दिनुभयो ।
इन्द्रावतीले गाउँपालिकामा रहेका स्वास्थ्य संस्थामा पीपीई, सेनिटाइजर, मास्कलगायत सामग्री वितरण गरिसकेको छ । गाउँपालिकामा रहेका स्थानीयलाई पनि सामग्री वितरण भएको उहाँले जानकारी दिनुभयो ।
आवश्यक परेको खण्डमा गाउँपालिकाले थप सामग्री वितरण गर्ने पालिकाले जनाएको छ ।
प्रकाशित मिति: शनिबार, चैत २२, २०७६
