काभ्रे ।
कोरोना भाइरसको संक्रमण रोकथाम तथा नियन्त्रणका लागि सरकारले गरेको लकडाउन अनिश्चित बनेसँगै जन्मथलो फर्कनेको लर्को लागेको छ ।
काठमाण्डौं उपत्यकाबाट काभ्रे हुँदै दैनिक सयौंको संख्यामा मानिसहरू पैदल यात्रा गरिरहेका छन् ।
काठमाण्डौंबाट सप्तरी हिंड्नुभएका बेचु साहको गुनासो छ, प्रशासनले ठुलाबडालाई सवारी पास दियो तर मदजुरलाई भने घर जाने व्यवस्था भएन ।
साहले भन्नुभयो, ‘पासै दिंदैन, अस्ति हामी पास लिन गएको सर, तर पासै दिएनन् । ठूला ठूला मान्छेहरूलाई मात्रै दिन्छन् । नगरपालिकामा गयौं चामल लिन, चामल पनि दिएनन्, नागरिकता माग्छन्, सबैसँग नागरिकता कहाँ हुन्छ ?’
पिठ्युँमा सानो बच्चा बोकेर काठमाण्डौंबाट ओखलढुंगा हिँडुनुभएकी मनिसालाई भने सँगै रहेका बच्चालाई के खुवाउने भन्ने चिन्ता छ ? लकडाउनका कारण सबै बन्द छ, बाटोमा न खाना पाइन्छ न त पानी ।
मनिसाले गुनासो गर्नुभयो, ‘यहाँ बस्दाबस्दा पैसा सकिइहाल्यो अनि के खाएर बस्ने त ? त्यसैले हिडेको । खुट्टा दुखिसक्यो हिड्दा हिड्दा । साना बच्चाहरू छन्, चार/पाँच दिन लाग्छ ।’
राजधानीबाट बाहिरिने अधिकांश यात्रु दैनिक ज्यालामजदुरी गरि जीविकोपार्जन गर्नेहरू छन् । आफूसँग भएको पैसा सकिएपछि घरमा जे छ त्यहि खाउँला भनेर फर्किएको उनीहरू बताउँछन् ।
बाटोमा अलपत्र परेकाहरुलाई रोशी गाउँपालिका, नमोबुद्ध नगरपालिका र पनौती नगरपालिकाले अर्को स्थानीय तहसम्म पुग्न सहयोग गर्ने गरेका छन् ।
पानस पार्टी प्यालेश, पनौती युवा मञ्च लगायतका संस्थाहरूले खानाको व्यवस्था गरेका छन् । यकिन तथ्यांक नभएपनि हालसम्म अरनिको र विपी राजमार्ग भएर बाहिरिने पैदल यात्रुको संख्या तीन हजार भन्दा बढि रहेको अनुमान गरिएको छ ।
लकडाउन अर्थात् बन्दाबन्दी भनिएपनि दैनिकी सहज बनाउन घर फर्कने यात्रुको लाइन लामो छ । उनीहरू घण्टौं हिडेरै भएपनि घर पुग्न चाहेका छन् ।
शहरमा भोकै बस्नुभन्दा केही दिनको सास्ती सहेर भएपनि गाउँ फर्कन चाहेको उनीहरू बताउँछन् । घर फर्कन चाहेका नागरिकलाई सुरक्षित तरिकाले गाउँ पु¥याउन सरकारले विशेष कदम चाल्नुपर्ने देखिन्छ ।
अडियो सुन्नुहोस् :
प्रकाशित मिति: शनिबार, चैत २९, २०७६
