काठमाडौं । चितवनको नारायणी सामुदायिक अस्पतालका एक चिकित्सकसहित १६ जना कोरोनामुक्त भएका छन् । सङ्क्रमण भएका चिकित्सक आइसोलेसनमा थिए भने अरु घरकै एकान्तबासमा थिए । स्वाब परीक्षणमा उनीहरुमा सङ्क्रमण नभएको रिपोर्ट आएको छ ।
उनीसहित नारायणी सामुदायिक अस्पतालबाट स्वाब संकलन गरिएका १६ जना कोरोनामुक्त भएका अस्पतालका अध्यक्ष भक्तमान श्रेष्ठले सीआईएनसँग बताउनुभयो । अस्पतालको आईसीयूसहित क्षेत्रमा काम गर्ने स्वास्थ्यकर्मीहरुको कोरोना परीक्षण गरिएको र कसैमा पनि संक्रमण नभेटिएको पनि उहाँले जानकारी दिनुभयो ।
१८ जनामा कोरोना भाइरस संक्रमण
गण्डकी प्रदेशमा भने थप १८ जनामा कोरोना भाइरस संक्रमण पुष्टि भएको छ । स्वास्थ्य निर्देशनालय पोखराका अनुसार गोरखामा १० जना, स्याङजामा ४ जना, नवलपरासी पूर्ब सुस्तामा २ जना, कास्की र बाग्लुङमा १÷१ जना गरी थप १८ जना सङ्क्रमित फेला परेका छन् ।
गोरखा नगरपालिकाका वर्ष ३२, ३५, २१, २६, ५३, २९ र २५ का ७ पुरुष र ३१ वर्षीय १ एक महिलामा कोरोना संक्रमणको पुष्टि भएको छ भने बारपाक सुलिकोट गाउँपालिकाका वर्ष २५ र ५३ का २ पुरुषमा कोरोना संक्रमणको पुष्टि भएको छ ।
स्याङजाको चापाकोट नगरपालिकाका वर्ष १८, १८, ३५ र ३९ का ४ जना पुरुषमा कोरोना संक्रमणको पुष्टि भएको छ । नवलपरासी जिल्ला (बर्दघाट सुस्ता पूर्व) को बिनयत्रिबेणी गाउँपालिकाका १८ वर्षीय एक पुरुषमा र मध्यबिन्दु नगरपालिकाका वर्ष १९ का १ जना पुरुषमा कोरोना संक्रमणको पुष्टि भएको छ ।
कास्कीको पोखरा महानगरपालिकाका वर्ष २१ का १ जना पुरुष र बाग्लुङको ताराखोला गाउँपालिकाका ३४ वर्षका १ जना पुरुषमा कोरोना संक्रमणको पुष्टि भएको छ । यो सँगै गण्डकी प्रदेशमा कोरोना संक्रमितको संख्या २ सय २३ पुगेको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोद विन्दु शर्माले जानकारी दिनुभयो ।
प्रकाशित मिति: मंगलबार, असार २, २०७७, ११:२९
