अछाम । अछामको साँफेबगरदेखि कैलालीको धनगढीका लागि हवाई सेवा सुरु भएको छ । जिल्लाको साँफेबगर विमानस्थलबाट धनगढीको गेटा विमानस्थलका लागि आज समिट एयरले उडान भरेपछि अछाम र धनगढी हवाई सेवामा जोडिएका हुन् ।
सूदुरपश्चिममा प्रदेशभित्रै हवाई सेवा सुरु भएको यो पहिलो पटक हो । अबदेखि नियमित रुपमा प्रत्येक शुक्रवार अछाम–धनगढी र धनगढी–अछामका लागि हवाई सेवा सञ्चालन हुनेछ । यो रुटका लागि समिट एयरले ३ हजार ३ सय ५० रुपैयाँ भाडादर कायम गरेको छ । समिट एयरका साँफेबगर प्रतिनिधि दिपक दुवालका अनुसार यात्रुहरुको चाप बढेमा हप्तामा चार पटकसम्म उडान भर्न मिल्नेगरी व्यवथापन गरिएको भएपनि अहिले परीक्षणका रुपमा एक दिन मात्रै उडान नियमित गरिएको छ ।
हवाई जहाजमा अछामदेखि धनगढीको दुरी जम्मा १७ मिनेट रहेको छ । द्वन्दकालदेखि बन्द रहेको साँफेबगर विमानस्थल गएको फागुन महिनादेखि सुचारु भएको थियो । विमानस्थल पुननिर्माणपछि पहिलो पटक समिट एयरले साँफेबगर–नेपालगञ्ज उडान भरेको थियो । सफल परीक्षणपछि अहिले नेपाल एयरलायन्सले साँफेबगरदेखि नेपालगञ्जसम्म नियमित रुपमा सेवा दिइरहेको छ ।
सडक यात्रा गर्दा पुरै एकदिन लाग्ने अछाम धनगढीका लागि हवाई सेवा सुरु भएपछि स्थानीयहरु खुसी भएका छन् । अब अछामसहित बाजुरा र डोटीका स्थानीयलाई समेत साँफेबगरबाट प्रदेशको अस्थाई राजधानी धनगढी पुग्न सहज भएको छ ।
प्रकाशित मिति: शुक्रबार, चैत ८, २०७५
