अछाम ।
अछामको रामारोशन गाउँपालिकाको कैलाश खोलाले बगाएका १७ जनामध्ये ६ जनाको शव भेटिएको छ ।
हिजो राति परेको अबिरल बर्षाले गर्दा आएको बाढीले रामारोशन गाउँपालिका वडा नम्बर ५ सैनिबजारबाट बगाएका १७ जनामध्ये ६ जनाको शव कैलाशको विभिन्न स्थानमा भेटिएको हो ।
४ जनाको शव बान्नीगढी जयगढ गाउँपालिका वडा नम्बर ६ दर्नामा पर्ने कोसेडा क्षेत्रमा भेटिएको स्थानीय देबेन्द्र थापाले जानकारी दिनुभयो ।
त्यही स्थलमा खटिनुभएका स्थानीय प्रकाश कुँवरका अनुसार २ जनाको शव मंगलसेन नगरपालिका वडा नम्बर ३ मा पर्ने लमतणा र सेरीमा भेटिएको छ ।
जनप्रतिनीधि, प्रहरी प्रशासन र स्थानीय उद्धारकर्मीको टोली सैनिबजारमा उद्धारका लागि गइसकेको रामारोशन गाउँपालिकाका अध्यक्ष झँकरबहादुर साउदले बताउनुभयो ।
जिल्लाबाट झण्डै ७ घण्टा पैदल हिडेर लाग्ने भएकाले चाडै उद्धारका लागि पहल भईरहेको अछामका प्रमुख जिल्ला अधिकारी गोकर्णप्रसाद उपाध्यायले जानकारी दिनुभयो ।
चाँडै हेलिकप्टर मार्फत उद्धारका लागि केन्द्रसँग समन्वय भईरहेको प्रमुख जिल्ला अधिकारी उपाध्यायले बताउनुभयो ।
शव भेटिएकाहरूको सनाखत हुन सकेको छैन ।
प्रकाशित मिति: बुधबार, भदौ ३, २०७७
