काठमाडौँ । अध्ययनअनुसार नेपालमा विद्यालय उमेर समूहका एक हजार बालबालिका मध्ये सात जनामा वाथ मुटु रोगको समस्या छ ।
सामान्यतया ५ देखि १५ वर्षसम्मको उमेरमा लाग्ने वाथ मुटुरोगीको सङ्ख्या नेपालमा झण्डै १ लाख छ । सहिद गंगालाल हृदय रोग केन्द्र, त्रिवि शिक्षण अस्पताल र सहिद धर्मभक्त राष्ट्रिय प्रत्यारोपण केन्द्रमा यो रोगको निःशुल्क उपचार गराउन सकिन्छ ।
वाथ मुटुरोगबाट प्रभावित रामेछापका फुर्तिनी तामाङ शल्यक्रियापछि स्वस्थ जीवन बिताइ रहनुभएको छ । सानैदेखि बाथमुटु रोगबाट प्रभावित भए पनि उहाँले ४० वर्षको उमेरमा मात्रै शल्यक्रिया गर्नुभयो । सरकारले वाथ मुटुरोगको शल्यक्रिया निशुल्क गरेकाले मात्र आफ्नो शल्यक्रिया सम्भव भएको उहाँले बताउनुभयो ।
नेपालभर बाथ मुटुरोगबाट प्रभावित १ लाख बालबालिका छन् । बर्सेनि साढे सात हजारको दरले यो रोगका बिरामी थपिने गरेका छन् ।
रोग लागेको सुरुवाती अवस्थामा नै यो रोग विरुद्ध सुई लगाउन सके रोगलाई नियन्त्रण गर्न सकिन्छ । तर यसबारेमा नागरिकलाइ पर्याप्त जानकारी भएको पाईँदैन । सरकारले पनि आफ्नो कार्यक्रम बाथ मुटुरोग बारेमा जानकारी दिन कार्यक्रम केन्द्रीत गरेको छैन ।
सहिद धर्मभक्त राष्ट्रिय प्रत्यारोपण केन्द्र भक्तपुरका मुटु रोग विशेषज्ञ डा.सम्पूर्णमान तुलाधरका अनुसार बालबालिकालाई घाँटी दुख्ने, थुक निल्न गाह्रो हुने, टन्सिल बढ्ने, जोर्नी दुख्ने जस्ता समस्याले वाथ मुटुरोग निम्त्याउन सक्ने भएकोले समयमै यसको उपचार गराउनुपर्छ ।
सरकारले २०७३ फागुन १ गतेदेखि यो रोगको निशुल्क उपचार सेवा उपलब्ध गराउँदै आएको छ भने नेपाल हृदय रोग निवारण संस्थाले देशका विभिन्न ४० ओटा अस्पतालमा यो रोग विरुद्धको सुई निशुल्क उपलब्ध गराउँदै आएको छ ।
प्रकाशित मिति: आइतबार, चैत १०, २०७५
