नारायणी एफएम, वीरगन्ज ।
वीरगन्ज स्थित सामुदायिक रेडियो नारायणी एफएमका रेडियोकर्मीमा कोरोना सङ्क्रमण देखिए पनि उनीहरूले एफएम स्टेशनलाई नै आईशोलेसन बनाएर रेडियोको प्रसारणलाई निरन्तरता दिएका छन् ।
नारायणी एफएममा सञ्चारकर्मी र कर्मचारी गरी अहिलेसम्म ७ जनामा कोरोनाको सङ्क्रण देखिएको छ । ती मध्ये स्टेशन प्रमुख क्रान्ति शाह भने साउन ३० गते कोरोना मुक्त भइ घरमै स्वास्थ्यलाभ गरिरहनुभएको छ ।
अरू ६ जना रेडियोकर्मी मध्ये एकजना प्राविधिक घरकै आइशोलेसनमा बसिरहेका छन् ।
भदौ ६ गते सङ्क्रमण पुष्टि भएका ५ जना रेडियोकर्मीले भने एफएम स्टेशनमै आइशोलेन बनाएर रेडियोको प्रशारणलाई निरन्तरता दिएका हुन् ।
रेडियोमा आफूसँगै काम गर्ने सहकर्मीहरू सङ्क्रमित भएपछि एफएममा कार्यरत अन्य ८ जना रेडियोकर्मी भने होम क्वारेन्टाइनमा छन् ।
पछिल्लो पटक गत भदौ ४ गते रेडियोमा कार्यरत मध्ये ६ जनाले पीसीआर परिक्षण गराएकोमा ५ जनामा भदौ ७ गते सङक्रमण पुष्टि भएको रेडियोमा कार्यरत शिवनाथ यादवले सीआईएनसँग बताउनुभयो ।
सङ्क्रमण पुष्टि भएपछि सङ्क्रमित रेडियोकर्मीलाई स्थानीय प्रशासनले फोन गरेर कोभिड अस्पतालमा लैजाने तयारी गरेको थियो ।
तर उनीहरूले अहिलेको महामारीमा नागरिकलाई पलपलमा सूचनाको खाँचो रहेकाले रेडियोमै आइशोलेसन बनाएर बस्ने निर्णय गर्दै रेडियोको प्रशारणलाई निरन्तरता दिएका हुन् ।
यादवले भन्नुभयो, ‘ एक त हामी कोभिड अस्पताल नजाँदा लक्षण देखिएका अरू ५ जनाले बेड पाउनुहुन्छ । अर्को भनेको हामीमा लक्षण छैन, सुरक्षित तरिकाले सूचना प्रवाहको काम गर्न सक्छौं भने किन यही बसेर काम नगर्ने ? भन्ने भयो र यही बसेका हौं ।’
गत साउन १८ गते स्टेशन प्रमुख क्रान्ति शाह नै सङ्क्रमित भएपछि साउन १९ गते नै कोभिड अस्थायी अस्पतालमा १२ दिन बसेर कोरोना मुक्त भइ साउन ३० देखि घरमा स्वास्थ्यलाभ लिईरहनुभइको अकोराबका मासचिव समेत रहनुभएका रेडियोका कार्यकारी अध्यक्ष गोविन्द देवकोटाले जानकारी दिनुभयो ।
देवकोटाले भन्नुभयो, ‘होम क्वारेन्टाइनमा रहनु भएका स्टेशन प्रमुखले घरबाटै समाचार तयार पारेर रेडियोमा समाचार पठाउनु हुन्छ, रेडियोमा रहेका साथीहरूले समाचार पढ्ने गर्नु हुन्छ ।’
साउन २८ गते रेडियोका ५ जनाले पीसीआर परिक्षण गराउँदा थप एक जना प्राविधिकलाई सङ्क्रमण देखिएको थियो भने अरू ४ जनाको रिपोर्ट नेगेटिभ आएको थियो ।
देवकोटाले भन्नुभयो, ‘नेपालमा पहिलो पटक सङ्क्रमितहरूले रेडियोमा रहेर नागरिकलाई सूचना दिने काम गर्नुभएको छ, सामुदायिक रेडियोको मुल मर्म नै यहि हो, आफू जोखिममा रहेको अवस्थामा पनि संकटपूर्ण स्थितीमा रहेको समुदायलाई सूचना दिन बन्द गरिएन ।’
सङ्क्रमित भएर पनि रेडियोमै आइशोलेसनमा बसेर काम गरिरहेका यादवसँग गीता चिमोरियाले गर्नुभएको कुराकानी सुन्नुहोस् :
प्रकाशित मिति: मंगलबार, भदौ ९, २०७७
