घनश्याम गौतम, रेडियो गलकोट, बागलुङ ।
बागलुङको ढोरपाटन नगरपालिकाको भुजीखोलामा गएराति आएको बाढीमा परेर मृत्यु हुनेको संख्या १२ पुगेको छ ।
बाढीमा परि ४२ जना जना बेपत्ता भएका छन् ।
जिल्ला प्रहरी कार्यालय बागलुङका अनुसार दिउँसो सम्ममा ४२ जना बेपत्ता भएको र यो संख्या अझै थपिन सक्ने देखिएको छ ।
आज बिहानसम्म १३ जना बेपत्ता भएको जानकारी आए पनि प्रहरी र नेपाली सेनाको टोली घटनास्थलमा प्रत्यक्ष पुगेपछि तेब्बर बढी संख्यामा मानिस बेपत्ता भएको पाइएको जिल्ला प्रहरी कार्यालय बागलुङका प्रहरी नायव उपरीक्षक राजेन्द्र रेग्मीले जानकारी दिनुभयो ।
राती करिब १२ बजे भूजीखोलामा आएको बाढीले ढोरपाटन वडा नम्बर ७, ८ र ९ का ३१ घर बगाएको छ ।
मृतकमध्ये पाँच जना पुरुष र एक बालिकासहित ८ जना महिला छन् । जसमा एक महिलाको भने सनाखत भएको छ । ढोरपाटन नगरपालिका ९ का २६ वर्षीया केशमाया विकको मृत्यु भएको हो ।
शवहरू कतै पुलको लठोमा अड्किएको अवस्थामा त कतै खोला किनारको बालुवामा भेटिएको प्रहरीले जानकारी दिएको छ ।
शव क्षतविक्षत अवस्थामा रहेकाले पहिचान गर्न कठिन भएको हो ।
बाढीले ढोरपाटन ९ स्थित लाकुरीबोट स्वास्थ्य चौकीको भवन, जनचेतना प्राविको ४ कोठे भवन, सरस्वती प्राविको २ कोठे भवन, भुजीखोला लघु जलविद्युत् आयोजनाको ५ वटा शाखामध्ये ४ वटा भवन र एउटा जिप समेत बगाएको छ । बाढीमा पशुबस्तु समेत बगेका छन् ।
यसैबीच, बाढी प्रभावित क्षेत्र जिल्लाको ढोरपाटन नगरपालिकामा राहत सहित हिँडेका गृहमन्त्री रामबहादुर थापासहितको टोली बीच बाटोबाटै फिर्ता भएको छ ।
भुजीखोलामा बाढीले पु¥याएको क्षतिबारे स्थलगत जानकारी लिन नेपाली सेनाको हेलिकप्टर मार्फत् उडेका गृहमन्त्री थापा मौमस खराब भएपछि स्याङ्जाको आकाशबाटै पोखरा विमानस्थलमा आकस्मिक अवतरण गर्नुभएको थियो ।
गृहमन्त्री सहितको टोली चढेको हेलिकप्टर अत्याधिक वर्षाका कारण मौसमले साथ नदिएपछि बीच बाटोबाटै पोखरा फर्किएको हो ।
बाढीमा परेर बेपत्ता हुनेहरूमा ढोरपाटन नगरपालिका ९ बस्ने वर्ष २२ का जीवन बिक, सोही ठाउँका वर्ष २४ का नारायण बिक, उनका श्रीमती वर्ष २१ का टेकमाया बिक र उनीहरूका एक वर्षिय छोरी रहेका छन् ।
यस्तै, सोही ठाउँका वर्ष १६ का मनिषा बिक, घट्टेचौर बस्ने वर्ष २८ का शनि विक, उहाँका छोरा वर्ष १० का रोशन बिक, छोरा वर्ष ४ का रवि बिक रहेका छन् । नाम नखुलेको १५ दिनको बच्चासमेत बाढीमा बगेको छ ।
यसैगरी, २६ वर्षका मन कुमारी बि.क., ३० वर्षका प्रेम पुन, भुसुन्डे बस्ने वर्ष ३० वर्षका कुमारी बिक, वर्ष १४ का समुन्द्र बिक, वर्ष १० का पुनम बिक, वर्ष ३० का जीतबहादुर घर्ती रहेका छन् ।
वर्ष ४३ का राजु घर्ती, घट्टेबोट बस्ने वर्ष ३५ वर्षका करमती बुढा, वर्ष ३६ का रिना कुमारी घर्ती, वर्ष २० का दिलमया पुन, उहाँका छोरी वर्ष ३ कि प्रकृति पुन ६१ व्र्षिया डोटी पुन, सानो कुगु बस्ने वर्ष का हेमबहादुर बिक, उहाँका श्रीमती वर्ष ३४ का उजेली बिक, छोरा वर्ष ८ का दलु बिक, १० महिनाका बच्चालाई पनि बाढीले बगाएको छ ।
वर्ष ४० का करबहादुर बिक, उहाँका श्रीमती वर्ष ३७ का हस्तमाया बिक, दुनेपधेरा बस्ने वर्ष ६०का तुलमती घर्ती, लाकुरी बोट बस्ने वर्ष ५५ का कौशिला पुन, उहाँका छोरा वर्ष २१ का विशाल पुन, पावरहाउस बस्ने वर्ष २६ का धनमाया बिक र उहाँका ३ वर्षका छोरा पनि बेपत्ता भएका छन् ।
सुप्राङ बस्ने उमेर नखुलेका बिरे बिकका श्रीमती र दुई छोराछोरी सहित ४ जनाको परिवार, बागलुङ गलकोट नगरपालिका ४ घर भई ढोरपाटन घुम्न गएका वर्ष २४ का नबिन भण्डारी र बागलुङ ढोरपाटन नगरपालिका ९ सुप्राङ बस्ने नामथर र वर्ष नखुलेका अन्य ३ जनालाई पनि बाढीले बगाएको छ ।
प्रकाशित मिति: बिहीबार, भदौ १८, २०७७
