अर्जुन बोहरा, रेडियो कर्णाली आवाज, हुम्ला
गएरातएदेखि हुम्लामा हिमपात भएको छ । हिमपातका कारण हुम्ला लगायतका हिमाली जिल्लाहरुमा जनजीवन प्रभावित बनेको छ ।
हिमपातका कारण स्थानीय घरबाहिर निस्कन सकेका छैनन् ।
उत्तरी नाम्खा गाउँपालिकाको लिमीमा एक फिटभन्दा बढी हिउँ जमेको नाम्खा गाउँपालिका वडा नम्बर ६ का वडाअध्यक्ष पाल्जोेर तामाङले बताउनु भयो ।
सिमकोटमा तापक्रम माइनस ८ डिग्रीमा झरेको छ ।
आइतबार रातीदेखि परेको हिउँले हुम्लाको सिमकोट, मुगुको ताल्चा, जुम्ला, अछामको साँफेबगर लगायतका हिमाली जिल्लामा रहेको हवाई सेवा बन्द भएको विमानस्थल श्रोतले बताएको छ ।
हिमपातले चिसो बढेसँगै तिहारको अन्तिम दिन भाईटीकामा टीका थाप्न जान समस्या भएको छ ।
एक सात अघिको हिउँ पग्लन नपाउँदै पुनः हिमपात शुरु भएपछि समस्या भएको सिमकोटका होटल व्यवसायी र स्थानीय बासिन्दाले बताएका छन् ।
तर ग्रामिण क्षेत्रका किसानहरूलाई भने हिमपातले उत्साहित बनाएको छ । दैनिकीमा भने समस्या भएको छ । हिमपातले धाराबाट पानी ल्याउन समेत कठिन भएको सिमकोट २ का गोरसिंह बोहराले बताउनुभयो ।
जिल्लाको उत्तरी नाम्खा गाउँपालिकामा हिमपातले गाईवस्तु, याक चौरीलाई समस्या भएको त्यस क्षेत्रका स्थानीयले बताएका छन् ।
उच्च हिमाली जिल्ला हुम्लामा हिमपात र पानी परिरहेकाले सतर्कता अपनाउन प्रमुख जिल्ला अधिकारी चिरन्जीवी गिरीले यहाँका स्थानीयलाई आग्रह गर्नुभएको छ ।
पश्चिमी भूभागमा सामान्यदेखि पूर्ण बदली भएको हुँदा कर्णालीका हुम्ला, मुगु, जुम्ला, डोल्पा लयातका जिल्लाहरुमा पानी पर्नुका साथै उच्च हिमाली क्षेत्रमा हिमपात भईरहेको मौसम विज्ञान विभागले जनाएको छ ।
प्रकाशित मिति: सोमबार, मंसिर १, २०७७
