चित्रबहादुर गुरुङ, मनकामना एफएम, गोरखा
देशकै चर्चित धार्मिक स्थल मनकामना माईको मन्दिरमा बलि चढाउन रोक लगाइने भएको छ ।
कोभिड १९ सङ्क्रमणका कारण ९ महिनादेखि बन्द रहेको मन्दिर यहि मंसिर २८ गते आईतबारबाट खुल्ने भएपनि बलि चढाउन भने रोक लगाइने भएको हो ।
मनकामना क्षेत्र विकास समितिको हिजो मंगलबार बसेको बैठकले सर्वसाधारणको लागि पूजा गर्न विभिन्न स्वास्थ्य मापदण्ड अपनाएर मन्दिर खुला गर्ने निर्णय गरेको समितिका कार्यकारी निर्देशक लेविन्द्र गुरुङले जानकारी दिनुभयो ।
उहाँका अनुसार मन्दिरमा पञ्चबली दिनका लागि रोक लगाउने निर्णय भएको हो ।
यस्तै समितिको बैठकले विशेष पूजा गर्न र लाखबत्ति बाल्न पनि रोक लगाउने निर्णय गरेको निर्देशक गुरुङले बताउनुभयो ।
‘अहिलेलाई बलि दिन, विशेष पुजा गर्न, लाखबत्ति बाल्नका लागि पूरै रोक लगाईएको छ । दर्शनार्थीको ज्वरो नाप्ने, व्यक्तिगत विवरण राख्ने, भौतिक दुरी कायम गरेर पुजा गर्ने व्यवस्था गर्न लागेका छौं’ –उहाँले भन्नुभयो ।
यसैगरी दर्शनार्थीको लाईनमा कम्तिमा ४० मिटरको फरकमा साबुन पानी र सेनिटाईजरको व्यवस्था, मनकामना बजार क्षेत्र प्रवेश गर्ने ४ वटै नाकामा मास्क अनिवार्य प्रयोगको लागि चेकजाँचको समेत व्यवस्था गर्न लागिएको उहाँले बताउनुभयो ।
साथै मन्दिर र केवुलकार सञ्चालनका लागि समन्वय गरिदिन जिल्लास्थित कोभिड १९ संकट व्यवस्थापन केन्द्रलाइ पत्राचार गर्ने तयारी भइरहेको पनि समितिले जनाएको छ ।
कोभिड १९ को सङ्क्रमण फैलन सक्ने जोखिमलाई मध्यनजर गर्दै सरकारले गत चैत ८ गतेदेखि मनकामना माईको मन्दिरमा सर्वसाधारणका लागि पूजा गर्न रोक लगाएको थियो ।
यसैबीच, मन्दिर खुलेकै दिनदेखि केवुलकार पनि सञ्चालन हुने भएपछि आवश्यक मर्मत सम्भारको काम सुरु भएको मनकामना दर्शन प्रालिका नायव प्रवन्धक उज्वल शेरचनले जानकारी दिनुभयो ।
‘मर्मत सम्भारको काम लगभग सकिसकेका छौं, सप्टवेयर, हार्डवेयरको र सरसफाइको काम बाँकी छ, तीन दिनमा सबै काम सक्छौ,’ उहाँले भन्नुभयो ।
स्वास्थ्य सुरक्षा मापदण्डका लागि ‘स्टाण्डर अपरेसन प्रोसिजर (एसओपी) निर्माण गरिएको उहाँले जानकारी दिनुभयो । शेरचनका अनुसार केवुलकारले साविकको भन्दा आधा मात्र यात्रु बोक्ने छ ।
शेरचनले भन्नुभयो, ‘यसअघि एउटा कारमा ६ जना यात्रु हुन्थे तर अब तीन जना मात्र राख्छौं, मास्क र सेनिटाइजर अनिवार्य गरेका छौं । केवुलकारको मुख्य प्रवेशद्धारमा थर्मलगनबाट यात्रुहरुको ज्वरो नाप्ने व्यवस्था समेत गरिने छ ।’
प्रकाशित मिति: बुधबार, मंसिर २४, २०७७
