बैतडी । बैैतडीको पञ्चेश्वर गाउपालिकामा पोष्टमार्टमका लागि शव लिएर आउँदै गरेको जीप दुर्घटना हुँदा ५ जनाको मृत्यु भएको छ । आज दिउँसो से १ ज १८३ नम्बरको जीप पञ्चेश्वर गाउँपालिकाकै वडा नं ६ को गणमेश्वर मोडमा दुर्घटना हुँदा चालकसहित ५ जनाको मृत्यु भएको हो ।
दुर्घटनामा ४ जनाको घटनास्थलमै र चालकको उपचारका लागि जिल्ला अस्पताल ल्याउँदै गर्दा बाटोमै मृत्यु भएको जिल्ला प्रहरी कार्यालय बैतडीले जानकारी दिएको छ ।
मृत्यु हुनेमा चालक तेज भण्डारी, पञ्चेश्वर गाँउपालिका वडा नं ६ का करिब ३० वर्षीय डम्मरसिंह भण्डारी, ५० वर्षीय जितसिंह भण्डारी, २७ वर्षीय हिक्मत भण्डारी र ४० वर्षीय दीपक भण्डारी रहेको जिल्ला प्रहरी कार्यालय बैतडीका प्रवक्ता दर्शन खड्काले जानकारी दिनुभयो ।
जीपमा सवार अन्य ५ जना घाइते भएका छन् । उनीहरूलाई उपचारको लागि जिल्ला अस्पताल ल्याइँदै छ । गएराति वडा नं ६ कै वडा सदस्य गोबिन्दसिंह भण्डारीको मृत्यु भएको थियो ।
उहाँको शव पोष्टमार्टमको लागि जिल्ला अस्पताल ल्याउँदै गर्दा जीप दुर्घटनामा परेको हो ।
प्रकाशित मिति: मंगलबार, वैशाख २१, २०७८, १६:५३
