अछाम । लगातारको वर्षाका कारण अछामको मेल्लेख गाउँपालिका-५ बिन्धेबासिनीको सरानी गाउँ पहिरोको जोखिममा परेको छ ।
गाउँको तल र माथिबाट पहिरो खसेपछि गाउँमा बसोबास गर्नेहरू डराएका छन् । १ सय ७ घरपरिवारको बसोबास रहेको सरानीमा ५३ घरधुरी उच्च जोखिममा परेको स्थानीयबासीको भनाइ छ ।
गाउँको तल र माथिबाट अहिले पनि लेदोसहितको माटो बगिरहेको छ ।
सरानीको तल्लो टोलका २८ घर माथिल्लो टोलमा २५ घरधुरी पहिरोको जोखिममा परेको वडाध्यक्ष रमेशबहादुर खड्काले जानकारी दिनुभयो ।
सरानीको तल्लो टोलका २८ घर परिवारलाई नजिकै रहेको भट्टेडाडा आधारभूत विद्यालयका सार्ने तयारी भएको उहाँले जानकारी दिनुभयो । केही घरपरिवार हिजो नै विद्यालयमा सरेका छन् भने बाँकी घरधुरीलाई आज विद्यालयमा सार्ने तयारी भएको वडाध्यक्ष खड्काले बताउनुभयो ।
पहिरो पीडितको व्यवस्थापन गर्न शस्त्र प्रहरी र स्थानीय जनप्रतिनिधि लागिरहेका छन् । विभिन्न सङ्घसंस्थाले राहतको लागि पहल पनि गरिहरेका छन् ।
प्रकाशित मिति: शुक्रबार, साउन २२, २०७८
