काठमाडौँ । अमेरिकी सहायता परियोजना मिलिनियम च्यालेञ्ज कर्पोरेशन (एमसिसी) को टोलीले एमसीसी परियोजनाको बारेमा शीर्ष तहको छलफल सकेको छ ।
छलफल र संवाद सकेर एमसीसीका उपाध्यक्ष फातिमा सुमार नेतृत्वको टोली आज राति साढे ८ बजे फर्कँदैछ ।
तीन दिनको यसबीचको समयमा प्रधानमन्त्री, मन्त्री तथा राजनीतिक दलका शीर्ष नेतासँग भेटेर एमसीसीका उपाध्यक्ष सुमारको टोलीले एमसिसी परियोजनालाई चाँडै अनुमोदन गर्न वा अस्वीकार गर्न आग्रह गरेको नेताहरूले बताएका छन् ।
प्रधानमन्त्री शेरबहादुर देउवा भने सत्ताधारी र प्रमुख प्रतिपक्षी दल नेकपा एमालेसँग थप छलफल गरेर मात्रै एमसीसीको बारेमा निर्णय गर्ने निचोडमा पुग्नुभएको उहाँको सचिवालयले जनाएको छ ।
उपाध्यक्ष सुमारसहितको टोलीले हिजो अर्थमन्त्री जनार्दन शर्मालाई भेटेर यस बारेमा छिटो टुङ्गो लगाउन अनुरोध गरेको मन्त्री शर्माको सचिवालयले जनाएको छ ।
मन्त्रालयमा भएको भेटमा अर्थमन्त्री शर्माले एससीसीबारे राजनीतिक स्तरमा छलफल भइरहेको जानकारी गराउनुभएको थियो ।
सीआईएनसँग कुराकानी गर्दै राष्ट्रिय योजना आयोगका पूर्व उपाध्यक्ष, अर्थविद् डा. दिपेन्द्र बहादुर क्षेत्रीले एमसीसीका केही प्रावधानका बारेमा हतारमा निणर्य लिन नहुने बताउनुभयो ।
प्रमुख प्रतिपक्षी दल नेकपा एमालेले एमसिसी परियोजनाका प्रावधान संशोधन हुनुपर्ने निष्कर्ष निकालेको छ । तत्कालीन नेकपाको कार्यदलले दिएको संशोधन सहित एमसीसीलाई अगाडि बढाउने सुझावमा एमाले कायम रहेको प्रचार विभाग प्रमुख योगेश भट्टराईले जानकारी दिनुभयो ।
स्थायी समितिको हिजोको बैठक पछि पत्रकारहरुसँग कुरा गर्दै भट्टराईले एमसीसीका प्रावधानको पुनव्र्याख्या गर्नुपर्ने सर्त राख्ने बैठकबाठ निष्कर्ष निकालिएको बताउनुभयो ।
नेकपा एकीकृत समाजवादीका अध्यक्ष माधवकुमार नेपालले भने अमेरिकाले एमसीसी परियोजनासँग सुरक्षा रणनीति नजोडिएको लिखित दिनुपर्ने बताउनुभएको छ ।
बाँकेको नेपालगन्जमा भएको एक कार्यक्रममा अध्यक्ष नेपालले सुरुमा एमसीसी परियोजना नेपालको हितमा छ भन्ने पुष्टि गरेपछि मात्रै यसको प्रक्रिया अगाडी बढाउन सकिने बताउनुभयो ।
प्रकाशित मिति: आइतबार, भदौ २७, २०७८, ०८:१३
