पाँचथर । पाँचथर याङ्वरक-३, की २६ वर्षका जुनु बेघा लिम्बू जन्मजात अपाङ्ग हुनुहुन्छ ।
उहाँका दुईवटै खुट्टा छैनन् । जुनुको कष्टकर दैनिकीबारे थाहा पाएपछि यूकेमा रहेका मनकारी नेपाली सामाजिक सञ्जाल फेसबुकको माध्यमबाट सङ्गठित भए ।
सहयोग अभियानबाट सङ्कलित १५ लाखभन्दा धेरै रकम जुनुलाई केही दिनअघि हस्तान्तरण गरियो ।
पाँच जनाको समूहले त्यतिका रकम सङ्कलन गरी एक लाख रुपैंयाँ जुनुलाई घर खर्च र बाँकी १४ लाख रुपैंयाँ जुनुका दुई छोरीको नाममा नेपाल बैँक लिमिटेड फिदिममा मुद्दती खाता खोली जम्मा गरिदिएको अभियानका एक सदस्य सकुन नेम्बाङ लिम्बूले बताउनुभयो ।
सामाजिक सञ्जालको दुरुपयोग गर्ने प्रवृति बढिरहेको बेला प्रवासमा रहेका केही मनकारी भने सामाजिक सञ्जालकै माध्यमबाट नेपालीको दुखःसुखमा एक जुट हुने गरेका छन् ।
उनीहरूले मठमन्दिर, भवन, खेलमैदान जस्ता संरचना निर्माणसँगै प्राकृतिक विपत्तिमा परेका र उपचार अभावमा छटपटाईरहेका गरीब दीनदुःखीलाई सहयोग गर्दै आएका छन् ।
रोजगारी, अध्ययनलगायतका विभिन्न सिलसिलामा विश्वका विभिन्न मुलुक पुगेका नेपालीहरूले यस्तो अभियानमा सहयोग गर्दै आएका छन् ।
कोही, कसैलाई सहयोग गर्नुपरे निश्चित समयका लागि सामाजिक सञ्जालमा समूह बनाइन्छ ।
उक्त समूहमा सहयोगी, साथीहरूलाई जोडेर सहयोग रकम जम्मा गरेर दिन पाउँदा खुसी लाग्ने एक जना अभियन्ता मिना केरुङले कुबेतबाट फेसबुक म्यासेञ्जरमा बताउनुभयो ।
प्रवासमा रहेका पाँचथरबासीले मात्र हरेक वर्ष लाखौँ रकम सामाजिक कामका लागि जिल्ला पठाउने गरेका छन् ।
संसारको जुनसुकै ठाउँमा रहेको मानिससँग पनि इन्टरनेटको सहायताले तत्काल कुराकानी गर्न, दुखःसुख भन्न सकिने भएको छ । यसका लागि फेसबुक, ट्विटर, भाइबर, इमो, इन्स्टाग्राम, वाट्सएप जस्ता सञ्जाल माध्यम भएका छन् ।
पाँचथर बहुमुखी क्याम्पसका सहायक प्राध्यापक लक्ष्मी प्रसाद ढुंगाना प्रवासमा रहेका पाँचथरबासीहरूको यस किसिमको अभियानले समाज रुपान्तरणमा सहयोग पुगेको बताउनुहुन्छ ।
अर्काको ठाउँ, परिवारको जिम्मेवारी पूरा गर्ने दायित्व, निश्चित आम्दानीका बीच पनि नेपालीको दुखमा साथ दिन परदेशीहरू तयार हुन्छन् ।
तर उनीहरूले पठाएको रकम सम्बन्धित काम वा व्यक्तिले जस्ताकोतस्तै पाउनेगरी व्यवस्थापनमा पनि सरोकारवाला निकायको ध्यान जानुपर्छ ।
प्रविधिको विकासले विश्वलाई एकै ठाउँमा ल्याइदिएको छ ।
संसारको जुनसुकै ठाउँमा रहेको मानिससँग पनि इन्टरनेटको सहायताले तत्काल कुराकानी गर्न, दुखःसुख भन्न सकिने भएको छ । यसका लागि फेसबुक, ट्विटर, भाइबर, इमो, इन्स्टाग्राम, वाट्सएप जस्ता सञ्जाल माध्यम भएका छन् ।
सामाजिक सञ्जालकै माध्यमबाट सङ्गठित हुने र सामाजिक कार्य गर्नेहरू व्यक्तिगत तथा सामूहिक रुपमा अघि बढेका छन् ।
अडियो रिपोर्ट सुन्नुहोस्ः
प्रकाशित मिति: बिहीबार, असोज ७, २०७८
