काठमाडौँ । राष्ट्रभावको गीत ‘खोजीरहेछ देशले एक युग नायक’ सार्वजनिक भएको छ ।
डा. नवि अधिकारी ‘टाकिन्द्र’को शब्द अनि सन्तोष श्रेष्ठको सङ्गीत र स्वर रहेको गीत हिजो एक कार्यक्रमका बीच राजधानी काठमाडौँमा सार्वजनिक भएको हो ।
कार्यक्रममा यस गीतका सङ्गीतकार तथा गायक श्रेष्ठले प्रेम भावका गीतमा नियमित काम गरिरहेको भए पनि राष्ट्रियताको भाव बोकेको गीत पनि ल्याउन पाउँदा खुसी लागेको बताउनुभयो ।
नेपालमा बिभिन्न कालमा भएका आन्दोलनको जगमा परिवर्तन भए पनि सर्वस्वीकार्य युग नायकको अभाव, आवश्यकतामा गीतले जोड दिएको छ ।
यस गीतको भिडियो निर्देशन हेम प्रभास अधिकारीले गर्नुभएको हो भने युवराज दाहाल लगायतको अभिनय रहेको छ ।
रामुकार केसीले भिडियो छायाङ्कन गर्नुभएको हो भने देवेन्द्र नेवाको अरेन्ज तथा मिक्सिङ प्रकाश मिश्रले गर्नुभएको हो ।
प्रकाशित मिति: बुधबार, असोज १३, २०७८, १०:१२
