काठमाडौँ । प्रधानमन्त्री शेरबहादुर देउवा बेलायत भ्रमण सकेर आज स्वदेश फर्कनुभएको छ ।
बिहान त्रिभुवन अन्तर्राष्ट्रिय विमानस्थलको अति विशिष्ट कक्षमा आयोजित पत्रकार सम्मेलनमा प्रधानमन्त्री देउवाले विश्व जलवायु सम्मेलन (कोप-२६) बैठकको क्रममा विश्वका नेताहरूसँग भएका भेटवार्ताका बारे जानकारी गराउनुभएको थियो ।
प्रधानमन्त्री देउवाले अमेरिकी राष्ट्रपति जो बाइडेन नेपालको बारेमा जानकार भएको बताउनुभयो ।
बाइडेन यसअघि नेपाल आएको र मन पर्ने सुनाउनुभएको देउवाको भनाइ थियो । बेलायतका प्रधानमन्त्री बोरिस जोन्सनसँग भएको भेटवार्ताबारे पनि प्रधानमन्त्री देउवाले जानकारी गराउनुभएको थियो ।
कोप २६ को क्रममा भएको भेटमा भारतीय प्रधानमन्त्री नरेन्द्र मोदीलाई नेपाल भ्रमणको निम्ता दिएको पनि देउवाले जानकारी दिनुभयो ।
‘मेरो निम्तालाई स्वीकार गर्नुभयो र मलाई पनि भारत भ्रमणको निम्ता दिनुभयो ।’ प्रधानमन्त्री देउवाले भन्नुभयो ।
एक फरक प्रसङ्गमा उहाँले ५ दलीय गठबन्धन आगामी चुनावसम्मै निरन्तर रहने बताउनुभयो ।
प्रकाशित मिति: बिहीबार, कात्तिक १८, २०७८, १०:३७
