बैतडी । बैतडीमा जीप दुर्घटना हुँदा पाँच जनाको मृत्यु भएको छ ।
जिल्ला प्रहरी कार्यालय बैतडीका सूचना अधिकारी बोधराज ओझाका अनुसार हिजो साँझ जन्ती बोकेको जीप दुर्घटनामा मृत्यु हुनेको सङ्ख्या पाँच पुगेको हो ।
मृत्यु हुनेमा दशरथचन्द नगरपालिका ६ का ४८ वर्षीय राजेन्द्र बहादुर चन्द, सोही ठाँउका ३८ वर्षीय धन बहादुर चन्द, ६५ वर्षीय प्रेम बहादुर चन्द, ६५ वर्षीय तारा सिह थापा र ५८ खेम सिह कार्की रहेको प्रहरीले जनाएको छ ।
वडा नम्बर ६ कै ५८ वर्षीय हर्क बहादुर चन्द र जीप चालक समेत रहेका डडेल्धुराका ४० वर्षीय दीपक माली दुर्घटनामा घाइते हुनु भएको छ ।
देहिमाण्डौबाट जन्ति लगेर दशरथचन्द नगरपालिका ६ सिमायलतर्फ जादै गरेको म १ ज ३१० नम्बरको जीप सोही नगरपालिकाको वडा नं ४ स्थित कलुवामोडमा हिजो साँझ साढे ८ बजे दुर्घटनामा परेको हो ।
जीप सडकबाट करिब ७ सय मिटर तल खसेको थियो । दुर्घटनाको कारण पत्ता लगाउन अनुसन्धान भइरहेको प्रहरीले जनाएको छ ।
प्रकाशित मिति: सोमबार, मंसिर ६, २०७८, ०७:३४
