काठमाडौँ । बीमा समितिले लामो समयदेखि रोकिएको कोरोना बीमा वापतको रकम दिने तयारी गरेको छ ।
२ वर्षअघि कोरोना महामारी सुरू हुनासाथ सरकारले सबै नागरिकलाई बीमा गर्न भनेको थियो । सर्वसाधारण नागरिकले बीमा गरे पनि कोरोना सङ्क्रमण भएका सबैले रकम पाएका थिएनन् ।
बीमा रकम दिनका लागि सरकारले निर्देशन दिइसकेका कारण अब वितरणको तयारी भइरहेको समितिको भनाइ छ ।
सरकारले भएको सहमति पालना नगर्दा ७० हजारभन्दा धेरै व्यक्तिले कोरोना बीमा वापतको रकम हालसम्म पनि पाएका छैनन् ।
गत वर्षको पुसमा कोरोना सङ्क्रमण भइ उपचारपछि निको भएर काममा फर्किएप नि बीमा रकम नपाएको बझाङका मदनबहादुर साँउदले बताउनुभयो ।
मदनबहादुर मात्रै होइन, नुवाकोटका वसन्त कार्कीले पनि कोरोना सङ्क्रमण भएको १५ महिना बितिसक्दा पनि बीमा वापतको रकम नपाएको गुनासो गर्नुभयो ।
कोरोनाको बीमा दाबी गरेका झन्डै डेढ लाखमध्ये १ लाखले बीमा बापतको रकम अझैँ पाउन सकेका छैनन् । बीमा समितिका कार्यकारी निर्देशक राजुरमण पौडेलले बीमा वापतको रकम प्रदान गर्न सरोकारवाला निकायसँग छलफल भइरहेको बताउनुभयो ।
सरकारले चालु आर्थिक वर्षदेखि कोरोना बीमा लागु नहुने बजेट भाषणमै प्रष्ट पारिसकेको भए पनि आर्थिक वर्ष २०७६/०७७ मै बीमा गरेकाले रकम पाउन ढिलो भएको थियो ।
बीमा रकम पाउँभन्दै अदालतमा मुद्दा परेका कारण पनि यो मुद्दाको बारेमा कुनै निर्णय हुनुअघि भने वितरण नगर्ने योजना समिति र अर्थमन्त्रालयको रहेको बुझिएको छ ।
हालसम्म देशभर करिव १७ लाख व्यक्तिले कोरोना बीमा गरेको बीमा समितिले जनाएको छ ।
प्रकाशित मिति: शनिबार, मंसिर १८, २०७८
