पाल्पा । कोरोना १९ महामारीले कुनै जात, धर्म वा वर्ग नभनी सबै नागरिक प्रभावित भइरहेका छन् ।
कोभिड महामारीका बेला समुदायका लागि सामुदायीक रेडियोले पनि महत्पूणर् रहेको स्थानीयबासीहरूले अन्तरक्रियाका क्रममा बताउँदा रेडियोकर्मीको रूपमा काम गरेकोमा गौरव महसुस भएको छ ।
अहिले धमाधम खोप लगाउने काम चलिरहँदा अझैँ पनि गाउँघरमा खोपका बारे मानिसहरूमा भ्रम रहेको अनि कतिपयले कोरोनाविरुद्धको बारेमा जानकारी नभएको गुनासो पनि गरेका छन् ।
ती गुनासोका बारेमा सरोकारवाला निकायका प्रतिनिधिलाई जानकारी गराउने र युनिसेफ अनि सामुदायिक रेडियो प्रसारक सङ्घ(अकोराब) नेपालसँगको सहकार्यमा सञ्चालन गरिएको फेसबुक ग्रुपमा अनुभव सुनाउन पाउँदा खुसी लागेको छ ।
यो ग्रुपमा भएका छलफलले हामीलाई दैनिक रेडियो कार्यक्रम उत्पादन तथा समाचार लेखनमा पनि सहयोग पुगेको मैले ठानेको छु ।
ग्रुपमा लेखिएका विषयका आधारमा समाचार र कार्यक्रम निर्माणमा के कुरालाई प्राथमिकता दिने भन्ने बारेमा निणर्य लिन सजिलो भएको छ ।
कोरोनाविरुद्धको खोप दिएर नागरिकलाई सुरक्षित बनाउन स्थानीय सरकारले काम पनि गरिरहेका छन् भने स्वास्थ्यसँग सरोकारवाला निकायले पनि काम गरिरहेको बताउँदै आएका छन् ।
तर सामाजिक रूपमा भएका बहसको बारेमा हुने छलफलको क्रममा पाल्पाको मैनादीका ५८ वर्षका जगदिश कुवँरले खोपबाट कति समय प्रतिरोधी क्षमता प्राप्त हुन्छ ? भन्ने प्रश्न गर्नुभयो ।
हामीले स्वास्थ्यकर्मीसँग सोधेर कुवँरको जिज्ञासा पनी मेटाउने काम गरिउँ ।
अहिले सर्वसाधारण नागरिकका मनमा कोरोनाविरुद्धको खोप अभियान र कोरोनाको प्रभावका बारेमा जिज्ञासा हटिसकेको छैन तर कम हुँदै गएको र जनमानसमा चेतना बढेको महसुस भएको छ ।
कोभिडले समजका कैयौँ मानिसहरूमा उदास हुने र मानसिकरूपमा विचलित हुने समस्या पनि देखिएको छ ।
कतिपयले कोरोना भाइरस शरीर बाहिर कति बाँच्छ भनेर पनी सोध्ने गरेको पाइयो ।
कोरोना सङ्क्रमण भएपछि र सामान्य रुघाखोकीका लक्षणका बारेमा अन्योल रहेको सामाजिक संवादका समयमा नागरिकले बताएका थिए ।
यो अन्योल चिर्नका लागि पनि रेडियोको समाचार तथा कार्यक्रममा विज्ञहरूसँग कुराकानी गरिएको छ ।
कोभिडको ओमिक्रोन भेरियन्टको सङ्क्रमणबाट बच्न पनि मास्कको सही प्रयोग गर्ने, भौतिक दूरी कायम गर्ने, बेलाबेलामा साबुन पानीले हात धुने वा स्यानिटाइजर प्रयोग गर्ने, भीडभाड नगर्ने, हावा आवतजावत हुने स्थानमा बस्ने लगायतका सबै जनस्वास्थ्यका मापदण्डहरूको कडाइपूर्वक पालना गर्नुपर्छ भन्ने बारेमा समुदायमा जागरण बढेको पाइयो ।
दलित समुदायमाथि र उनीहरूको बुझाइ, ज्ञान, सरकारी प्रयास र उनीहरूको दैनिक जनजीविकामा पारेको प्रभावसम्बन्धी सन्देशमूलक सामग्री रेडियोबाट प्रसारण गरेका थियौँ ।
हाम्रो यो कामकै कारण जिल्लाको रैनादेवी छहरा गाउँपालिकाले छहराको ३, ४ र ७ वडामा राहत वितरण गर्नुका साथै स्वास्थ्य साग्री पनि वितरण गरेको थियो ।
प्रकाशित मिति: आइतबार, फागुन ८, २०७८
