रामप्रकाश विक, रेडियो गुठिचौर
जुम्ला । जुम्लाको तिला गाउँपालिका ३ सार्कीबाडामा गएराति आगलागी हुँदा एकै घरका तीनसहित चार जनाको मृत्यु भएको छ ।
मृत्यु हुनेमा १४ वर्षीया तिर्सना सार्की, ११ वर्षीया अनु सार्की, ३ वर्षीया दर्शना सार्की र १ वर्षीय दिपेश सार्की रहनु भएको छ ।
स्थानीय मानसिंह सार्कीको घरमा राति ११ बजेर २० मिनेटमा आलगागी भएको थियो ।
मृत्यु हुनेहरुमा तीन जना मानसिंहका छोराछोरी हुन् । १४ वर्षीया तिर्सना भने मानसिंहको भान्जी रहेको प्रहरीले जनाएको छ । मृतक सबैको शव कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा ल्याइएको छ ।
कसरी आगलागी भयो भन्नेबारे अनुसन्धान भइरहेको जिल्ला प्रहरी कार्यालय जुम्लाका प्रमुख डीएसपी नरेन्द्र चन्दले जानकारी दिनुभयो ।
आगलागीले तीनतले घरको दुई तला पूर्ण नष्ट भएको प्रहरीले जनाएको छ ।
सदरमुकाम खलंगादेखि नेपाली सेना, नेपाल प्रहरी र सशस्त्र प्रहरीको टोली घटनास्थलमा पुगेर आगो नियन्त्रणमा लिएको थियो ।
मानसिंहको परिवार राति कामको लागि घर बाहिर निस्केको र घरमा फर्कँदा आगो लागेर घर जलिरहेको देखेको प्रहरीले जनाएको छ ।
प्रकाशित मिति: शनिबार, वैशाख १०, २०७९, ०८:२२
