काठमाडौँ । श्रीलङ्का टी–ट्वेन्टी विश्वकप क्रिकेटको सुपर १२ मा प्रवेश गरेको छ । विहीबार भएको खेलमा नेदरल्यान्ड्सलाई १६ रनले हराउँदै श्रीलङ्काले अर्को चरणको यात्रा तय गरेको हो ।
१६३ रनको लक्ष्य पाएको नेदरल्यान्ड्सले २० ओभरमा ९ विकेट गुमाएर १४६ रन मात्र बनाउन सकेपछि श्रीलङ्का विजयी भएको हो ।
पहिले ब्याटिङ गरेको श्रीलङ्काले २० ओभरमा ६ विकेट गुमाएर १६२ रन बनाएको थियो । श्रीलङ्काका कुशल मेन्डिसले ८९ रन बनाउनुभयो । उहाँले ४४ बलमा पाँच पाँच छक्का र चौका प्रहार गर्नुभयो ।
जवाफी ब्याटिङ गरेको नेदरल्यान्ड्सका म्याक्स ओडोवटले ७१ रन बनाए पनि टिमको जितका लागि त्यो पर्याप्त हुन सकेन । उहाँले ५३ बलमा ६ चौका र ३ छक्का प्रहार गर्नुभएको थियो
यो समूहबाट नेदरल्यान्ड्स पनि सुपर १२ मा पुग्ने सम्भावना भने बाँकी नै छ । यो समूहको अन्तिम खेलमा आज नै नामिबीया र यूएई खेल्ने छन् । यो खेल पछाडी यो समूहबाट दोस्रो राउण्डमा पुग्ने दोस्रो टोलीको टुङ्गो लाग्नेछ ।
प्रकाशित मिति: बिहीबार, कात्तिक ३, २०७९, १३:३३
