काठमाडौँ । इंग्ल्यान्ड टी-ट्वेन्टी विश्वकप क्रिकेटको सेमिफाइनल प्रवेश गरेको छ । सिड्नीमा शनिबार भएको खेलमा श्रीलंकालाई ४ विकेटले हराउँदै इंग्ल्यान्ड सेमिफाइनलमा प्रवेश गरेको हो । समुह १ बाट यसअघि न्युजिल्यान्ड समुह विजेता बन्दै सेमिफाइलन प्रवेश गरिसकेको छ । यससँगै अस्ट्रेलिया भने प्रतियोगिताबाट बाहिरिएको हो । अस्ट्रेलिया समुहको तेस्रो स्थानमा रह्यो ।
श्रीलंकाले दिएको १ सय ४२ रनको लक्ष्य इंग्ल्यान्डले १९ ओभर ४ बलमा ६ विकेट गुमाएर पूरा गर्यो । इंग्ल्यान्डलाई जिताउन एलेक्स हल्सले ४७ र बेन स्टोक्सले अविजित ४२ रन बनाए ।
श्रीलंकाका लाहिरु कुमार, धनन्जय डी सिल्भा र वानिन्दु हसरंगा डी सिल्भाले २/२ विकेट लिए । पहिले ब्याटिङ गरेको श्रीलंकाका पाथुम निसन्काले ६७ रन बनाएका थिए ।
इंग्ल्यान्डका मार्क उडले ३ विकेट लिए । यस जितसँगै इंग्ल्यान्डले समूह १ बाट सेमिफाइनलमा स्थान बनाएको हो । इंग्ल्यान्डले ५ खेलमा ७ अंक जोड्यो ।
यस समूहबाट अस्ट्रेलियाका साथै श्रीलंका, आयरल्याण्ड र अफगानिस्तान समेत प्रतियोगिताबाट बाहिरिएका छन् ।
प्रकाशित मिति: शनिबार, कात्तिक १९, २०७९, १७:२३
