काठमाडौँ । सशस्त्र प्रहरीकाे एपीएफ क्लब पीएम कप एकदिवसीय पुरुष क्रिकेट प्रतियोगिताको फाइनल प्रवेश गरेको छ ।
कीर्तिपुरमा आज भएको पहिलो सेमिफाइनलमा मधेश प्रदेशलाई ७ विकेटले हराउँदै एपीएफ फाइनल पुगेको हो । १ सय २३ रनको लक्ष्य एपीएफले २१ ओभर ३ बलमा मात्र ३ विकेट गुमाएर पूरा गर्यो ।
एपीएफको जितमा लोकेश बमले अविजित ३५, प्रदिप ऐरीले ३३ र आसिफ शेखले २५ रन बनाए । मधेश प्रदेशका रुपेश सिंहले २ विकेट लिए ।
टस हारेर पहिले ब्याटिङ गरेको मधेशले ३१ ओभरमा अलआउट हुँदै १ सय २२ रन बनाएको थियो ।
मधेशका लागि रुपेश सिंहले अविजित ३५ रन बनाए । एपीएफका कमल ऐरीले ४ तथा भुवन कार्की र मौषम ढकालले २/२ विकेट लिए ।
एपीएफले उपाधिका लागि नेपाल पुलिस क्लब र त्रिभुवन आर्मी क्लबमध्ये एक टिमसँग खेल्नेछ । दोस्रो सेमिफाइनल भाेली हुनेछ भने फाइनल खेल कात्तिक २६ गते शनिबार हुनेछ ।
प्रकाशित मिति: बिहीबार, कात्तिक २४, २०७९, १४:२०
