कृष्ण विष्ट
बैतडी । बैतडीमा मतपेटिका पुर्याएर फर्कँदै गरेको जिप दुर्घटना हुँदा चार जना प्रहरीको मृत्यु भएको छ । नौ जना प्रहरी घाइते भएका छन् । मृतक मध्ये तीन जनाको परिचय खुलेको छ ।
मृत्यु हुनेमा प्रहरी जवान लोकन्द्रबहादुर थापा मगर, प्रहरी जवान रमेश साउद र सहायक हवल्दार अर्जुन कठायत रहेको घटनास्थलमा खटिएका सत्बाज प्रहरी चौकीका इन्चार्ज ऐनबहादुर पालले जानकारी दिनुभयो । एकजनाको शव दुर्घटनाग्रस्त जिप मुनी रहेको र निकाल्ने प्रयास भइरहेको पनि उहाँले जानकारी दिनुभयो ।
घाइतेमध्ये ४ जनालाई नेपाली सेनाको हेलिकप्टर मार्फत नेपालगञ्ज पठाइएको छ । पाटन प्राथमिक स्वास्थ्य केन्द्रमा उपचार हुन नसकेपछि हेलिकप्टर मार्फत नेपालगञ्ज लगिएको प्राथमिक स्वास्थ्य केन्द्र पाटनले जनाएको छ ।
दशरथचन्द राजमार्गअन्तर्गत पाटन नगरपालिका–४, निङलाडी खोला नजिकैको थुम भन्ने ठाउँमा से १ ज ८५४ नम्बरको जिप आज बिहान दुर्घटना भएको हो । दुर्घटनाको कारण भने खुल्न सकेको छैन ।
प्रकाशित मिति: सोमबार, मंसिर ५, २०७९, ०९:४२
