काठमाडौँ । जापान, स्पेन, क्रोएसिया र मोरोक्को विश्वकप फुटबलको नकआउट चरणमा प्रवेश गरेका छन् ।
जर्मनी, बेल्जियम, कोस्टारिका र क्यानाडा भने समूह चरणबाटै बाहिरिएका छन् ।
गएराति भएको खेलमा स्पेनलाई २–१ गोल अन्तरले हराउँदै जापान समूह ‘इ’ को विजेता बन्दै नकआउट चरणमा पुगेको हो ।
जापानसँग पराजित भएपनि स्पेन समूह उपविजेता बनेर अन्तिम १६ मा प्रवेश गरेको छ ।
कोस्टारिकालाई ४–२ गोल अन्तरले पराजित गरेपनि जर्मनी प्रतियोगिताबाट बाहिरिएको छ ।
कोस्टारिका पनि समूह चरणको पुछारमा रहदै घर फर्किएको छ ।
क्रोएसियासँग गोलरहित बराबरीमा रोकिएपछि बेल्जियम पनि अन्तिम १६ मा अटाउन सकेन ।
क्रोएसिया भने नकआउट चरणमा प्रवेश गरेको छ । क्यानडालाई २–१ गोल अन्तरले हराउँदै मोरक्को नकआउट चरणमा पुगेको हो ।
क्यानडा भने अङ्क विहीन बन्दै घर फर्किएको छ ।
विश्वकपमा आज समूह ‘एच’ र समूह ‘जी’ का दुई–दुई खेलहरु हुनेछन् । समूह ‘एच’ अन्तर्गत दक्षिण कोरिया र पोर्चुगल तथा घाना र उरुग्वे खेल्नेछन् ।
यी खेल नेपाली समय अनुसार राति पौने ९ बजे सुरु हुनेछन् ।
यो समूहबाट पोर्चुगल नकआउट चरणमा पुगिसकेको छ । अन्य तीन टोलीको पनि नकआउटअ पुग्ने सम्भावना उत्तिकै रहेको छ ।
समूह ‘जी’ अन्तर्गत सर्बिया र स्विट्जरल्यान्ड तथा क्यामरुन र ब्राजिल खेल्नेछन् ।
यी खेल राति पौने १ बजे सुरु हुनेछन् ।
यो समूहबाट ब्राजिलले नकआउट चरणमा स्थान पक्का गरिसकेको छ ।
प्रकाशित मिति: शुक्रबार, मंसिर १६, २०७९
