काठमाडौँ । भोलि हुने काँग्रेस संसदीय दलको नेताको निर्वाचनका लागि आज मनोनयन दर्ता हुँदैछ ।
संस्थापन पक्षबाट पार्टी सभापति तथा प्रधानमन्त्री शेरबहादुर देउवा एक्लो उम्मेदवार भए पनि इतर समूहले दलको नेताको उम्मेदवार टुङ्गो लगाउन सकेको छैन ।
नेता शेखर कोइराला र महामन्त्री गगन थापाको दलको नेतामा इतर समूहबाट दाबी छ ।
दुवै नेताबीच रातभरिदेखि आज बिहानसम्ममा सहमति भएपछि मनोनयन गर्दा गरिने एक नेताले जानकारी दिए ।
काँग्रेस उपसभापति धनराज गुरुङले सहमति गराउन आफूले प्रयास गरे पनि दुवै नेता अडानबाट पछि नहट्दा सहमति जुट्न समस्या भएको बताउनुभयो ।
आज फेरि छलफल गरेर एक जना उम्मेदवार तय गरिने उहाँले जानकारी दिनुभयो ।
संस्थापन समूहबाट आकांक्षी देखिएका नेता रामचन्द्र पौडेल, डा. शशाङ्क कोइराला र प्रकाशमान सिंहले दावी छोडेपछि देउवालाई भने सजिलो भएको छ ।
प्रकाशित मिति: मंगलबार, पुस ५, २०७९, ०८:३१
