काठमाडौँ । कवितामा आधारित रियालिटी सो ‘द पोइट आइडल’ पुस १४ गते विहीबारदेखि प्रसारण हुने भएको छ । हरेक बिहीबार र शुक्रबार राति साढे ८ बजे एपीवान टेलिभिजनबाट प्रसारण हुने कार्यक्रमका लागि नेपालबाट १ सय ६२ जना छानिएका थिए ।
डिजिटल अडिसनबाट छानिएकामध्येबाट विभिन्न चरण पार गर्दै १४ जना कवि छानिने छन् । प्रतियोगिलाई कविता लेख्न बेग्लाबेग्लै विषय दिइने र उनीहरूले कविता लेखन र वाचन गर्ने आयोजकले जनाएको छ ।
अन्तिम १४ बाट हरेक हप्ता एक जना प्रतिस्पर्धी बाहिरिने र अन्तिममा एक जना ‘द पोइट आइडल’ बन्ने आयोजकले जनाएको छ । प्रतियोगिताको निर्णायकमा कविहरू विप्लव प्रतीक र उपेन्द्र सुब्बा तथा रङ्गकर्मी अनुप बराल र अभिनेत्री सुरक्षा पन्त रहेका छन् ।
कार्यक्रम अमनप्रताप अधिकारीले निर्माण र निर्देशन गर्नुभएको हो । विजेता कविले दस लाख रूपैयाँ पुरस्कार पाउनुका साथै यात्रा पब्लिसिङ् हाउसबाट ५ लाख रूपैयाँ बराबरको कविता सङ्ग्रह प्रकाशन गरिनेछ ।
प्रकाशित मिति: बुधबार, पुस १३, २०७९, १३:३६
