जीवन कैला
बाजुरा । भूकम्पमा परेर बाजुरामा एक जनाको मृत्यु भएको छ । भूकम्पमा परि बाजुराको गौमुल गाउँपालिकाका जमुना रोकायाको मृत्यु भएको गाउँपालिकाका अध्यक्ष हरिबहादुर रोकायले जानकारी दिनुभयो । भूकम्पले भत्काएको घरले थिचेर उहाँको मृत्यु भएको रोकायले बताउनुभयो ।
भूकम्पमा परेर राम दल बोहराका ४५ वटा भेडा मरेका छन् भने एक जना घाइते भएका छन् । अहिले प्रहरीको टोली गौमूलतर्फ जान लागेको जिल्ला प्रहरी कार्यालयले जनाएको छ ।
आज दिउँसो २ बजेर ४३ मिनेटमा बाजुराको मेला केन्द्रबिन्दु भएर गएको ५ दशमलव ९ रेक्टर स्केलको भूकम्पको धक्का डोटीसहित सुदूरपश्चिमका धेरै जिल्लामा महसुस भएको थियो । भूकम्पमा केही घरमा क्षति गरेको छ । यसबारेमा थप विवरण भने आउन बाँकी रहेको छ । गत कात्तिक २२ गते बिहान खप्तड केन्द्र बिन्दु बनाएर ६ दशमलव ६ रेक्टर स्केलको भूकम्प जाँदा ६ जनाको मृत्यु भएको थियो ।
प्रकाशित मिति: मंगलबार, माघ १०, २०७९, १७:४८
