काठमाडाैँ । प्रधानमन्त्री पुष्पकमल दाहाल ‘प्रचण्ड’ले आईसिसी विश्वकप लिग टू अन्तर्गत काठमाडौँमा भएको नामिबिया र स्कटल्यान्डसँगको खेल जित्ने खेलाडीलाई प्रतिव्यक्ति दुई लाख रुपैयाँ पुरस्कार दिने घोषणा गर्नुभएको छ । कीर्तिपुरमा भएका चार वटै खेल जितेकोमा खेलाडीलाई बधाइ दिँदै प्रधानमन्त्री दाहालले टोलिका खेलाडीलाई जनही दुई लाख रुपैयाँ पुरस्कार दिने घोषणा गर्नुभएको हो ।
यसैबिच, विश्वकप क्रिकेट लिग–टू अन्तर्गत फागुन १५ देखि यूएईमा हुने त्रिकोणात्मक शृङ्खलाका लागि नेपाली टोली घोषणा भएको छ । नेपाल क्रिकेट सङ्घ क्यानले बिहीबार पूर्व कप्तान सन्दीप लामिछानेबाहेक १५ सदस्सीय टोली घोषणा गरेको हो । बलात्कारको आरोप लागेपछि थुनामा रहेका सन्दीपलाई उच्च अदालतले २० लाख धरौटीमा रिहा गर्ने आदेश दिए पनि तर विदेश भ्रमणमा जान नपाउने सर्त राखेकोले क्यानले सन्दीपबिनाको टिम घोषणा गरेको हो ।
बलात्कारको आरोप लागे लगत्तै सन्दीपलाई क्यानले निलम्बन गरे पनि अदालतले धरौटीमा रिहा गर्ने आदेश दिनासाथ निलम्बन फुकुवा गरेको थियो । नेपालले फागुन १५ मा शृङ्खलाको पहिलो खेल पपुवा न्युगिनीसँग खेल्नेछ । यस्तै फागुन १८ मा युएईसँग, फागुन १९ मा पपुवा न्युगिनीसँग र फागुन २२ मा युएईसँग खेल्नेछ ।
रोहित पौडेलको कप्तानीमा रहेको टोलीमा सबै खेलाडी भर्खरै सकिएको स्कटल्यान्ड र नामिबियासँगको त्रिकोणात्मक शृङ्खला खेलेकै टोलीका सदस्य छन् । सन्दीपको ठाउँमा प्रतिश जीसीले मौका पाएका छन् । नेपाली टोलीमा रोहित पौडेल, कुशल भुर्तेल, आशिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी, गुल्शन झा, भिम सार्की, आरिफ शेख, प्रतिश जीसी र मौसम ढकाल छन् ।
प्रकाशित मिति: बिहीबार, फागुन ११, २०७९
