काठमाडौँ । नेपालमा मुख्य कृषिजन्य वस्तुको आयातनिर्यात घटेको छ ।
कृषि तथा पशुपन्छी विकास मन्त्रालयका अनुसार चालु आर्थिक वर्षको पहिलो ६ महिनामा कृषिजन्य वस्तुको आयात ४३ प्रतिशतले घटेको छ ।
भारतले कृषि उपजको निर्यातमा कडाइ गरेको र केही वस्तुको आन्तरिक उत्पादन बढेकाले आयात घटेको हो ।
कृषि तथा पशुपन्छी विकास मन्त्रालयका प्रवक्ता प्रकाशकुमार सञ्जेलले ठूलो मात्रामा आयात घट्नुको कारणबारे मन्त्रालयले छुट्टै अध्ययन नगरिए पनि भारतले कृषि उपजको निर्यातमा गरेको कडाइका कारण र केही वस्तुको आन्तरिक उत्पादन विगतको तुलनामा बढेको हुनाले आयात घटेको दाबी गर्नुभयो ।
उहाँका अनुसार धान र चामल तथा मकैको आयात घटेको छ ।
गहुँको आयात सबैभन्दा धेरै घटेको छ । भारतले गहुँ निर्यातमा रोक लगाउनाले त्यसको प्रत्यक्ष असर नेपालको आयातमा परेको उहाँको भनाइ छ ।
रूस–युक्रेन तनावका कारण भारतले आफ्नै मुलुकमा गहुँ अभाव हुने अनुमान गरेर यसको निर्यातमा प्रतिबन्ध लगाएको छ ।
केरा र आलुको आयात पनि घटेको छ । अन्य कृषि उपजको आयात घटिरहँदा प्याज आयात भने बढेको छ ।
प्रकाशित मिति: आइतबार, फागुन १४, २०७९, १०:०७
