काठमाडाैँ । अर्जेन्टिनाको राष्ट्रिय पुरुष फुटबल टिमका कप्तान तथा फ्रेन्च क्लव पेरिस सेन्ट जर्मेन क्लवका फर्वार्ड लियोनल मेस्सीले सन् २०२२ को उत्कृष्ट वर्ष खेलाडीको उपाधि जितेका छन् । मेस्सीले फ्रान्सका केलियन एमबाप्पे र करिम बेन्जेमालाई पछि पार्दै २०२२ को फिफा उत्कृष्ट वर्ष खेलाडीको उपाधि जितेका हुन् ।
३५ वर्षीय मेस्सीको कप्तानीमा अर्जेन्टिनाले कतार विश्वकप जितेको थियो। मेस्सीले यो आफ्ना लागि अचम्मको कुरा भएको बताउनुभयो । ‘यो एक ठूलो वर्ष हो र यहाँ आउनु र यो अवार्ड जित्नु मेरा लागि सम्मानको कुरा हो। मैले लामो समयदेखि आशा गरेको सपना पूरा भयो। धेरै कम मानिसले त्यो पूरा गर्न सक्छन् र म भाग्यमानी छु’ मेस्सीले भन्नुभयो ।
अर्जेन्टिना र एस्टन भिल्लाका एमिलियानो मार्टिनेज उत्कृष्ट पुरुष गोलकिपर बन्नुभयो । मार्टिनेजले विश्वकपमा उत्कृष्ट प्रदर्शन गर्नुभएको थियो । यस्तै अर्जेन्टिनालाई तेस्रोपटक विश्वकप जिताउन सफल लियोनेल स्कालोनी वर्षको उत्कृष्ट पुरुष फुटबल प्रशिक्षक घोषणा हुनुभयो । यो स्पर्धामा पेप ग्वार्डिओला र कार्लो एन्सेलोट्टी पनि हुनुहुन्थ्यो ।
यस्तै बार्सिलोनाकी एलेक्सिया पुटेलास वर्षको उत्कृष्ट महिला खेलाडी र इङ्ल्यान्डकी प्रशिक्षक सारिना विगम्यान उत्कृष्ट महिला प्रशिक्षक घोषणा हुनुभयो । महिलातर्फ इङ्ल्यान्डकी मेरी अरप्स उत्कष्ट गोलरक्षक बनेको फिफाले जनाएको छ ।
यस्तै उत्कृष्ट गोल कर्ताका रूपमा पोल्यान्डका मार्सिन ओलेक्सीले फिफा पुस्कास अवार्ड पाउनुभयो । मिडफिल्डर बेहोस भएपछि आफ्नो ज्यान बचाउन विपक्षी जर्ज टिगलको जिब्रो समातेका लुका लोचोसभिलीले फेयर प्ले अवार्ड पाउनुभयो
विजेताहरू-
उत्कृष्ट पुरुष खेलाडीः लियोनल मेस्सी ।
उत्कृष्ट महिला खेलाडीः एलेक्सिया पुटेलास ।
उत्कृष्ट पुरुष गोलकिपरः एमिलियानो मार्टिनेज ।
उत्कृष्ट महिला गोलकिपरः मेरी अरप्स ।
उत्कृष्ट पुरुष प्रशिक्षकः लियोनेल स्कालोनी ।
उत्कृष्ट महिला प्रशिक्षकः सरिना विग्म्यान ।
सर्वश्रेष्ठ पुस्कास अवार्डः मार्सिन ओलेक्सी ।
उत्कृष्ट फ्यान अवार्डः अर्जेन्टिना फ्यान ।
उत्कृष्ट फेयर प्ले अवार्डः लुका लोचोसभिली ।
प्रकाशित मिति: मंगलबार, फागुन १६, २०७९
