काठमाडाैँ । यूएईएमा चलिरहेकाे १९ वर्षमुनिको पुरुष विश्वकपको एसिया छनोट प्रतियोगितामा नेपाल लगातार चौथो खेलमा विजयी भएको छ । नेपालले आज मलेसियालाई १० विकेटले हराएको हो ।
७३ रनको सामान्य लक्ष्य नेपालले मात्र आठ ओभर पाँच बलमा कुनै विकेट नगुमाइ भेट्टाएको हो । नेपालका दीपक बोहोराले अवितिज ३८ तथा अर्जुन कुमालले अविजित २१ रन बनाउनुभयो ।
पहिला ब्याटिङ गरेको मलेसियाले ३५ ओभर तीन बलमा सबै विकेट गुमाएर ७२ रन बनाएको थियो ।
नेपालका लागि दीपेश कँडेलले १० ओभरमा ११ रन खर्चिएर ४ विकेट लिनुभभयो । आकाश चन्दले ४ दशमलब ३ ओभरमा ९ रन खर्चिएर ३ विकेट लिँदा, मिलन बोहोराले ९ ओभरमा ८ रन खर्चिएर २ विकेट लिनुभयो । २०१६ पछि पहिलो पटक विश्वकपमा छनोट हुने लक्ष्यका साथ यूएई पुगेको नेपाली टोली चार खेल देखि अपराजित छ ।
अन्तिम तथा निर्णायक खेलमा नेपालले बिहिबार घरेलु टोलीसँग खेल्नेछ । सो खेलमा जित हात पारे नेपाल २०१६ पछि पहिलो पटक १९ वर्ष मुनिको विश्वकप क्रिकेटका लागि छनोट हुनेछ ।
प्रकाशित मिति: मंगलबार, फागुन १६, २०७९
