विश्वकप क्रिकेट लिग टूमा नेपालले यूएईलाई ४२ रनले हराएको छ । २३० रनको लक्ष्य पाएको घरेलु टोलीलाई ४५ ओभरमा १८७ रनमा अल आउट गर्दै नेपाल विजयी भएको हो ।
यससँगै नेपालले एकदिवसीय विश्वकपको छनोट खेल्ने सम्भावना कायमै रहेको छ । यस्तै एकदिवसीय मान्यता जोगाइराख्ने सम्भावना बलियो बनेको छ । नेपालले अब पपुवा न्युगिनी (पीएनजी) र यूएईसँगै काठमाडौँमा दुई दुई खेलको शृंखला खेल्नेछ । एकदिवसीय विश्वकप छनोट खेल्न नेपालले बाँकी चारवटै खेल जित्नुपर्ने छ । यस्तै एकदिवसीय मान्यता जोगाइराख्न चार मध्ये २ खेल जिते पुग्ने छ ।
आजको खेलमा नेपालका सोमपाल कामी र दिपेन्द्रसिंह ऐरीले तीन तीन तथा करण केशी, सन्दीप लामिछाने, र आरिफ सेखले एक एक विकेट लिनुभयो । यूएईका आसिफ खानले ८२ तथा आरिफ लर्काले ५० रन बनाए पनि त्यो जितका लागि पर्याप्त भएन ।
यूएईमा टस जितेर पहिले ब्याटिङ रोजेको नेपालले ८ विकेट गुमाउँदै २२९ रन बनाएको हो । नेपालका लागि भीम सार्कीले सवैभन्दा धेरै ७० रन बनाउनुभयो । यस्तै, आरिफ सेखले अविजित ४३ कुशल मल्लले ३२ र सन्दीप लामिछानेले २७ रन बनाउनुभयो । यस्तै करण केसीले १७, ज्ञानेन्द्र मल्लले ११, आसिफ शेखले ६, दिपेन्द्रसिंह ऐरीले ४ र रोहित पौडेलले १ रन बनाउनुभयो ।
प्रकाशित मिति: सोमबार, फागुन २२, २०७९
