गुल्मी। अष्ट्रेलियामा रहेकाे सूचना प्रविधि सम्बन्धी कम्पनी 'एक्स्ट्राटेक'ले क्रिकेटर अर्जुन कुमाललाई ५० हजार रुपैयाँसहित सम्मान गरेको छ ।
नेपाललाई १९ वर्ष मुनिको विश्वकपमा पुर्याउन महत्त्वपूर्ण भूमिका निर्वाह गरेका कुमाललाई संस्थाले ५० हजार रुपैयाँ सहयोग गरेको हो । अस्ट्रेलियाबाट प्राप्त रकम सञ्चारकर्मी मोहन बस्नेतले क्रिकेटर कुमाललाई हस्तान्तरण गर्नुभयो ।
'एक्स्ट्राटेक'का निर्देशक विनोद कुँवरले कुमालको हौसला बढाउन सहयोग गरिएको बताउनुभयो । यसअघि पनि विभिन्न खेलाडी र खेल संस्थालाई सहयोग गर्दै आएको 'एक्स्ट्राटेक'ले आगामी दिनमा पनि सहयोग जारी राख्ने कम्पनीका हेड अफ क्यारियर काउन्सिलर सुदीक्षा गौतमले बताउनुभयो ।
क्रिकेटर कुमालले अहिले आफूलाई विभिन्न व्यक्ति र संस्थाले सहयोग गरिरहेको र यसले थप राम्रो खेल्न प्रेरणा मिलेको बताउनुभयो ।
क्रिकेटर अर्जुन कुमाल गुल्मीको छत्रकोट र 'एक्स्ट्राटेक'का निर्देशक कुँवर गुल्मीको मदानेका बासिन्दा हुन् ।
प्रकाशित मिति: मंगलबार, चैत १४, २०७९, १७:२५
