काठमाडाैँ । लुम्बिनी प्रदेशका मुख्यमन्त्री लीला गिरी पदमुक्त हुनुभएको छ । सोमबार प्रदेशसभा बैठकबाट विश्वासको मत पाउन नसकेपछि गिरी मुख्यमन्त्रीबाट पदमुक्त हुनुभएको हो । मतदानमा ५३ जना प्रदेश सांसदले अविश्वासको पक्षमा र एमालेका २९ र राप्रपाका ४ गरी ३३ जनाले विश्वासको पक्षमा मत दिएपछि मुख्यमन्त्री गिरी नेतृत्वको सरकार अल्पमतमा परेको हो ।
माओवादी केन्द्र, नेपाली काँग्रेस, नागरिक उन्मुक्ति पार्टी, जनता समाजवादी पार्टी, लोकतान्त्रिक समाजवादी पार्टी, जनमत पार्टी, एकीकृत समाजवादी पार्टी, राष्ट्रिय जनमोर्चा र स्वतन्त्र सांसदले विपक्षमा मतदान गरेको प्रदेश निर्वाचन कार्यालयले जनाएको छ।
गिरी गत पुस २७ गते नेकपा एमाले, माओवादी केन्द्र, राप्रपा, नागरिक उन्मुक्ति पार्टी, जनता समाजवादी पार्टी, लोकतान्त्रिक समाजवादी पार्टी, जनमत पार्टी र दुई स्वतन्त्र गरी ५८ जना सांसदको समर्थनमा मुख्यमन्त्री नियुक्त हुनुभएको थियो । तर, फेरिएको सत्ता समीकरणपछि राप्रपा बाहेकका दलले गत चैत १२ गते समर्थन फिर्ता लिएपछि गिरी नेतृत्वको सरकार अल्पमतमा परेको थियो।
यसअघि नै मुख्यमन्त्री गिरीलाई दिएको समर्थन फिर्ता लिँदै नेपाली काँग्रेसका डिल्ली चौधरीलाई मुख्यमन्त्री बनाउन माग गर्दै ८ दलका ५३ सांसदले प्रदेश प्रमुखलाई हस्ताक्षर बुझाएका छन्। एमालेले भने विश्वासको मत नपाए पनि ठुलो दलका रूपमा सरकारको नेतृत्व दाबी गरेको छ।
प्रकाशित मिति: सोमबार, वैशाख ११, २०८०
