काठमाडौँ । नेपाल एसीसी प्रिमिमयर कप क्रिकेटको विजेता बनेको छ । हिजो सुरु भएर आज सकिएको फाइनल खेलमा यूएईलाई ७ विकेटले हराउँदै नेपालले ५० ओभरमा अहिलेसम्मकै ठूलो सफलता हात पारेको हो । यससँगै नेपाल एसिया कप क्रिकेटका लागि छनोट भएको छ ।
एसिया कपमा नेपालले भारत र पाकिस्तानसँग खेल्नेछ । प्रतियोगिता अबको ४ महिनापछि पाकिस्तानमा गर्ने एसियाली क्रिकेट परिषदको तयारी छ । कीर्तिपुरमा यूएईले दिएको ११८ रनको लक्ष्य नेपालले ३० ओभर ३ बलमा ३ विकेट गुमाएर पूरा गर्यो ।
८ ओभरमा नेपालले २२ रनमात्र बनाउँदा ३ विकेट गुमाएको नेपालका लागि गुल्सन झा र भीम सार्कीले चौथो विकेटका लागि अबिजित ९६ रनको साझेदारी गर्नुभयो ।
गुलशनले अविजित ६७ र भीमले अविजित ३६ रन बनाउनुभयो । ओपनर कुशल भुर्तेल १ तथा आसिफ शेख ८ रनमा आउट भएको खेलमा कप्तान रोहित पौडेलले पनि १ रन मात्र जोड्न सके पछि नेपाल दबाबमा परेको थियो । तर, तेस्रो नम्बरमा ब्याटिङ गर्न पठाइएका गुल्सन र पाँचौ नम्बरका भीमको साझेदारी नेपालको जितको आधार बन्यो ।
यूएईका रोहन मुस्ताफाले २ विकेट लिनुभयो । हिजो नै सुरु भएको खेल पानी परेर रोकिएपछि बाँकी खेल आज भएको हो । बलिङमा नेपालका ललितनारायण राजवंशीले ४, सन्दीप लामिछाने र करण केसीले दुई दुई तथा सोमपाल कामी र गुल्सन झाले एक एक विकेट लिनुभएको थियो ।
प्रकाशित मिति: मंगलबार, वैशाख १९, २०८०
