काठमाडौँ । मलेसियासँगको दोस्रो महिला ट्वान्टी–ट्वान्टी क्रिकेटमा नेपाल विजयी भएको छ । मङ्गलवार भएको खेलमा नेपालले घरेलु टिमलाई ७ विकेटले हराएको हो । ९८ रनको लक्ष्य नेपालले १७ ओभर ३ बलमा ३ विकेट गुमाएर भेट्टाएको हो ।
नेपालका कविता कुँवरले २६ र सीता राना मगरले २३ रन बनाउनुभयो । यस्तै कप्तान रुबिना क्षेत्रीले अविजित २९ र बिन्दु रावलले अविजित १७ बनाउनुभयो ।
टस जितेको मलेसियाले पहिले ब्याटिङ गर्दै ५ विकेटको क्षतिमा ९७ रन जोड्यो। नेपालका रुबिनाले २ तथा कविता कुँवर र इन्दु बर्माले १-१ विकेट लिनुभयो ।
यससँगै पाँच खेलको शृंखला १-१ को बराबरीमा पुगेको छ। सोमबार भएको पहिलो खेलमा नेपाल ५ विकेटले पराजित भएको थियो ।
तेस्रो खेल आउँदो बिहीबार हुनेछ।
प्रकाशित मिति: मंगलबार, जेठ १६, २०८०, १३:५६
