काठमाडाैँ । चर्च ब्वाइज युनाइटेडले ए डिभिजन लिगको उपाधि जितेको छ । यसै सिजन बढुवा भएको चर्च ब्वाइजले एक चरणको खेल बाँकी छँदै ए डिभिजनको उपाधि जितेको हो ।
मङ्गलबार दशरथ रंगशालामा भएको खेलमा चर्च ब्वाइजले थ्रीस्टारसँग गोलरहित बराबरी खेल्यो । उसलाई लिग जित्न एक अंकमात्र आवश्यक थियो । यो बराबरीसँगै चर्च ब्वाइजको ४५ अंक भएको छ ।
दोस्रो स्थानमा रहेको मछिन्द्र क्लबको २ खेल खेल्न बाँकी हुँदा ३९ अंक छ र उसका दुई खेल बाँकी छन् । यी दुवै खेल जिते मछिन्द्रको पनि ४५ अंक हुनेछ । तर हेड टु हेडको आधारमा चर्च ब्वाइज नै बिजयी हुनेछ।
यससँगै दुई पल्टको डिफेन्डिङ मछिन्द्र उपाधि रक्षा गर्न असफल रह्यो । चर्च ब्वाइजले भने क्लब स्थापनाको १२ वर्षपछि ए डिभिजन लिगको उपाधि जितेको हो ।
यससँगै चर्च ब्वाइजले दुईवटा रेकर्डको बराबरी गरेको छ । चर्च ब्वाइजले सी देखि ए डिभिजनसम्म जित्ने र बढुवा भएकै सिजन ए डिभिजन जित्ने दुबै रेकर्डमा मनाङ मर्स्याङ्दीसँग बराबरी गरेको हो ।
प्रकाशित मिति: मंगलबार, जेठ २३, २०८०, २०:००
