भक्तपुर । मध्यपुर यूथ एसोसिएसनले ग्रास रुट फुटबल कार्यक्रम सुरु गरेको गरेको छ । मध्यपुर थिमीस्थित एसोसिएसनको कार्यालयमा शनिवार मध्यपुर नगरपालिकाका मेयर सुरेन्द्र श्रेष्ठले कार्यक्रमको उद्घाटन गर्नुभयो ।
अहिले ११० जना बालबालिकाले फुटबलको आधारभूत तालिम लिइरहेको एसोसिएसनका अध्यक्ष तथा नेपाली राष्ट्रिय फुटबल टिमका पूर्व कप्तान उपेन्द्रमान सिंहले जानकारी दिनुभयो ।
यो कार्यक्रम अन्तर्गत सुरुवातमा साप्ताहिक रूपमा आधारभूत फुटबल प्रशिक्षण दिने, लिग प्रतियोगिता सञ्चालन गर्ने र क्षमतावान् खेलाडीलाई एकेडेमीमै राखेर थप प्रशिक्षणको व्यवस्था मिलाइने उहाँले जानकारी दिनुभयो ।
अहिले साप्ताहिक रूपमा हरेक शनिवार डेढ घण्टाका दरले फुटबल सिकाइने र अहिले ६ देखि १३ वर्षसम्मका ११० जना बालबालिका रहेको एसोसिएसनले जनाएको छ । उनीहरूलाई उपेन्द्रमान सिंह, बालगोपाल महर्जन, राजेश मानन्धर, राकेश श्रेष्ठसहित थप १२ जना प्रशिक्षकले प्रशिक्षण दिने एसोसिएसनले जनाएको छ ।
प्रशिक्षण बर्सभरि नै सञ्चालन गर्ने लक्ष रहे पनि वर्षाका कारण २ महिना सञ्चालन गर्न कठिनाइ हुने देखिएको अध्यक्ष सिंहले बताउनुभयो ।
कार्यक्रममा ए डिभिजन लिगका च्याम्पियन प्रशिक्षक बालगोपाल महर्जनलाई सम्मान पनि गरिएको थियो ।
प्रकाशित मिति: शनिबार, जेठ २७, २०८०
