काठमाडौँ । एकदिवसीय विश्वकप क्रिकेट छनोटमा नेपाल वेस्ट इन्डिजसँग १०१ रनले पराजित भएको छ ।
आफ्नो तेस्रो खलमा वेस्टइन्डिजले दिएको ३४० रनको लक्ष्य पछ्याएको नेपालले खेल सकिन २ बल बाँकी हुँदा २३८ रन मात्र बनाउन सक्यो।
नेपालका आरिफ शेखले सर्वाधिक ६३ रन बनाउनुभयो । उहाँले ९३ बलमा ४ चाैका र १ छक्का प्रहार गर्नुभयो । यस्तै, गुल्सन झाले ४२, कप्तान रोहित पौडेल ३०, आसिफ शेख र करण केसीले २८/२८ तथा दिपेन्द्र सिंह ऐरी २३ रन बनाउनुभयो ।
यस्तै, कुशल भुर्तेल ५, भीम सार्की र कुशल मल्ल २/२ र सन्दीप लामिछाने १ रनमा आउट हुनुभयो । दुई पटक एक दिवसीय क्रिकेटको विश्वकप विजेता वेस्टइन्डिजसँग नेपालले अन्तिमसम्मै टिकेर खेलेको थियो ।
जिम्बावेमा नेपालले टस जितेर फिल्डिङ रोजेपछि पहिले ब्याटिङ गरेको वेस्ट इन्डिजले कप्तान साई होपको १३२ र निकोलस पुरनको ११५ रनको मद्दतमा ५० ओभरमा ७ विकेट गुमाएर ३३९ रन बनायो ।
नेपालका ललित राजवंशीले ३ तथा दिपेन्द्रसिंह ऐरी, सन्दीप लामिछाने, गुल्सन झा र करण केसीले एक÷एक विकेट लिनुभयो । नेपालको राम्रो सुरुवात गर्दै मात्र ९ रनमा वेस्ट इन्डिजका २ विकेट लिएको थियो ।
त्यस्तै ५५ रन हुँदा वेस्ट इन्डिजले आफ्नो तेस्रो विकेट गुमाएको थियो ।
तर, त्यसपछि वेस्ट इन्डिका ब्याटरले सम्हालिएर खेलेसँगै नेपालले ठुलो लक्ष्य पाएको थियो । चौथो विकेटका लागि होप र पुरनले २१६ रनको साझेदारी गरेपछि वेस्ट इन्डिज ठुलो योगफलतर्फ अग्रसर भएको थियो ।
नेपाल पहिलो खेलमा जिम्बावेसँग पराजित भएको थियो भने अर्को खेलमा अमेरिकालाई हराएको थियो । नेपालले आफ्नो चौथो खेल शनिबार नेदरल्यान्ड्ससँग खेल्ने छ ।
प्रकाशित मिति: बिहीबार, असार ७, २०८०
