काठमाडौँ । एकदिवसीय विश्वकप क्रिकेट खेल्ने नेपालको सम्भावना फेरि एकपटक अधुरै रहेको छ ।
विश्वकप छनोटमा आज नेदरल्यान्ड्ससँग ७ विकेटले पराजित भएसँगै नेपालको विश्वकप खेल्ने सपना यस पटकका लागि समाप्त भएको हो ।
महत्त्वपूर्ण खेलमा नेपाल नेदरल्यान्ड्ससँग ७ विकेटले पराजित भएको हो । नेपाललाई पराजित गरेसँगै नेदरल्यान्ड्स विश्वकप छनोटको सुपर सिक्समा प्रवेश गरेको छ । यो समुहबाट जिम्बावे र वेस्ट इन्डिज सुपर सिक्समा पुगिसकेका छन् ।
नेपालले दिएको १ सय ६८ रनको सामान्य लक्ष्य नेदरल्यान्ड्सले २८ ओभरमा ३ विकेट गुमाएर भेट्टायो । नेपालका सन्दीप लामिछानेले २ र गुल्सन झाले १ विकेट लिनुभयो ।
जिम्बावेको हरारेमा टस हारेर ब्याटिङ गरेको नेपालले ४५ औँ ओभरमा १६८ रनमै अलआउट भएको थियो ।
नेपालका रोहित पौडेलले ३३, कुशल भुर्तेल र सन्दीप लामिछानेले समान २७, भीम सार्कीले २२ रन बनाउनुभयो । यस्तै, दीपेन्द्रसिंह ऐरीले १४, कुशल मल्लले १२, आरिफ शेख ६ रन बनाउनुभयो ।
प्रकाशित मिति: शनिबार, असार ९, २०८०
