काठमाडाैँ । नेपालले एक दिवसीय क्रिकेटको विश्वकप छनोट अन्तर्गत सातौँ स्थानका लागि आयरल्यान्डसँग खेल्ने भएको छ ।
आज यूएईलाई ३ विकेटले हराउँदै नेपालले आयरल्यान्डसँग खेल्ने पक्का गरेको हो ।
उक्त खेल जिते नेपाल छनोट प्रतियोगितामा सातौँ हुनेछ भने पराजित भए आठौँ हुनेछ । १८२ रनको मध्यम लक्ष्य पाए पनि खराब ब्याटिङ गर्दै धरमराएको नेपाललाई जिताउन दिपेन्द्रसिंह ऐरीले अविजित ७९ रन बनाउनुभयो । यस्तै सन्दीप लामिछानेले अविजित २३, कुशल भुर्तेलले ३५, ज्ञानेन्द्र मल्लले १३ र गुल्सन झाले १२ रन बनाउनुबाहेक अन्यले दोहोरो अङ्कमा रन जोड्न सकेनन् ।
नेपालले आज आसिफ शेख, कुशल मल्ल र ललितनारायण राजवंशीलाई विश्राम दिएर अर्जुन साउद, ज्ञानेन्द्र मल्ल र प्रतिश जिसीलाई खेलाएको थियो ।
नेपालले टस जितेर फिल्डिङ रोजेपछि ब्याटिङमा आएको यूएईले ४७ औँ ओभरमा १ सय ८१ रनमा अलआउट भएको हो । यूएईका वृत्या अरविन्दले ४४, रोहन मुस्ताफाले ३५ र अर्यांश शर्माले २८ रन बनाउनुभयो । नेपालका सन्दीप लामिछाने र करण केसीले ३–३ विकेट तथा प्रतिश जिसी, दीपेन्द्रसिंह ऐरी र गुल्सन झाले १–१ विकेट लिनुभयो ।
प्रकाशित मिति: आइतबार, असार १७, २०८०
