काठमाडौँ । सार्क फिल्म फेस्टिवलमा नेपालले दुई वटा पुरस्कार जितेको छ ।
श्रीलङ्काको कोलम्बोमा सम्पन्न ‘सार्क फिल्म फेस्टिवल’ मा चलचित्र ‘बुलबुल’ बाट नायिका स्वस्तिमा खड्काले ‘स्पेशल जुरी अवार्ड- पर्फमेन्स’ जित्नु भएको छ । स्वस्तिमाले बुलबुलमा निर्वाह गरेको भूमिकालाई उत्कृष्ट ठहर्याउँदै जुरीले अवार्ड प्रदान गरेको हो ।
यसअघि सोही फेस्टिवलमा नायिका गरिमा पन्तले चलचित्र ‘झोला’ मार्फत उत्कृष्ट नायिकाको अवार्ड जित्नु भएको थियो । अविनाश विक्रम शाहले निर्माण गरेको छोटो चलचित्र ‘टाटिनी’ले विशेष मान्यता पुरस्कार (स्पेशल रिकग्नाइजेशन) अवार्ड प्राप्त गरेको छ ।
यस वर्ष ‘सार्क फिल्म फेस्टिबल’ मा ‘प्रसाद’ र ‘बुलबुल’ प्रतिष्पर्धा विधामा पठाउने निर्णय चलचित्र विकास बोर्ड नेपालले गरेको थियो । सार्क फिल्म फेस्टिवलमा भाग लिन नायिका स्वस्तिमा खड्का र 'प्रसाद' फिल्मका निर्देशक दिनेश राउत कोलम्बो जानु भएको थियो ।
प्रकाशित मिति: सोमबार, असार २३, २०७६
