काठमाडौँ । सरकारले बुधवार (आज)देखि १४ वर्ष पूरा भई १५ वर्ष ननाघेका किशोरीलाई पाठेघरको मुखको क्यान्सरविरुद्धको खोप (एचपीभी) दिन थालेको छ । २०६५ साल भदौ ३० देखि २०६६ भदौ ३० गतेसम्म जन्म मिति भएका किशोरीले मात्र खोप लगाउन पाउने स्वास्थ्य तथा जनसङ्ख्या मन्त्रालयले जनाएको छ ।
पहिलो चरणको खोप अभियान अन्तर्गत सातै प्रदेशका सातवटा अस्पतालमा खोप लगाउने व्यवस्था मिलाइएको स्वास्थ्य सेवा विभागले जनाएको छ ।
विभागकाअनुसार भदौ २७ देखि ३० गतेसम्म बागमती प्रदेशका लागि परोपकार प्रसूति तथा स्त्रीरोग अस्पताल काठमाडौँ, गण्डकी प्रदेशका लागि गण्डकी स्वास्थ्य विज्ञान प्रतिष्ठान पोखरा, लुम्बिनी प्रदेशका लागि भेरी अस्पताल बाँके र कर्णाली प्रदेशका लागि कर्णाली प्रादेशिक अस्पताल सुर्खेतमा खोप लगाइने छ ।
यस्तै, कोसी प्रदेशका किशोरीलाई कोसी अस्पताल विराटनगरमा भदौ २८ देखि ३० गतेसम्म, सुदूरपश्चिम प्रदेशको डडेलधुरा अस्पतालमा भदौ २७ देखि २९ गतेसम्म र मधेस प्रदेशका लागि नारायणी अस्पताल वीरगन्जमा भदौ २९ गतेदेखि ३१ गतेसम्म खोप लगाइने विभागले जनाएको छ ।
विभागको बाल स्वास्थ्य खोप शाखा प्रमुख डा. अभियान गौतमले यो खोप अभियानका लागि २० हजार डोज एचपीभी खोप सम्बन्धित अस्पतालमा पुर्याइसकिएको सीआईएनसँग बताउनुभयो । खोप लगाउन उमेर खुल्ने आधिकारिक प्रमाण बोक्न डा. गौतमले आग्रह गर्नुभयो । यो खोप ६ महिनाको फरकमा २ मात्रा लगाउने तयारी छ ।
एचपीभी खोप दुई मात्रा पूरा गरेमा पाठेघरको मुखमा हुने क्यान्सरबाट किशोरीलाई जोगाउन सकिने क्यान्सर रोग विशेषज्ञ डा. उज्ज्वल चालिसेले बताउनुभयो ।
अहिले नमुना कार्यक्रमको रूपमा सञ्चालन गर्न लागिएको अभियान भविष्यमा नियमित खोप कार्यक्रमसमावेश गर्ने सरकारको तयारी छ ।
प्रकाशित मिति: बुधबार, भदौ २७, २०८०
