रुपन्देही । रेडियो लुम्बिनी रुपन्देहीले परम्परागत आरन पेशा जोगाउन महत्वपूर्ण भूमिका खेलेको भन्दै ५६ वर्षीय श्रमिक महिला उमाकला बिकलाई नगद ८ हजारसहित सम्मान गरेको छ ।
रेडियोको २० औँ साधारणसभा तथा दसौँ अधिवेशनका अवसरमा आज भएको कार्यक्रममा २० वर्षदेखि परम्परागत आरन पेशा गर्दै आउनु भएका तिलोत्तमा नगरपालिका वडा नम्बर ५ निबासी उमाकलालाई सम्मान गरिएको हो । पूर्व अध्यक्षहरू भरतराज भुसाल, अर्जुन ज्ञवाली, शशिधर पौडेल, कृष्णप्रसाद नेपाल, डिआर घिमिरे, लक्ष्मण ज्ञवाली र कृष्णप्रसाद अर्याललाई पनि प्रमाणपत्रबाट सम्मान गरिएको थियो ।
रेडियो लुम्बिनीको २० औँ साधारणसभा तथा दसौँ अधिवेशनबाट दुजेन्द्र बस्नेत अध्यक्षमा सर्वसम्मत चयन हुनुभएको छ ।
अधिवेशनबाट उपाध्यक्षमा दुर्गाप्रसाद पाण्डे, कोषाध्यक्षमा अर्जुनराज उपाध्याय, सञ्चालक सदस्यहरूमा इन्द्रबहादुर सुनार, रामबहादुर बस्नेत, शारदा अर्जेल, रामचन्द्र पाण्डे, विष्णुप्रसाद पाण्डे, लोकनाथ पाण्डे, रामप्रसाद ढकाल, दिनेश रायमाझी, केशवराज गौतम उपाध्याय, टङ्कप्रसाद पाण्डे, देवी वाग्ले र धुकला कुँवर चयन हुनुभएको छ । लेखा समिति संयोजकमा विष्णुप्रसाद पाण्डे र सदस्यद्वयमा इश्वरी शर्मा र त्रिलोचन ज्ञवाली चयन हुनु भएको छ ।
२० औं साधारणसभा एवं दसौँ अधिवेशन आज रुपन्देहीको मणिग्राममा सम्पन्न भएको हो । कार्यक्रममा बोल्दै पूर्व अर्थ मन्त्री तथा नेकपाका महासचिव बिष्णु पौडेलले शान्तिका नाममा धन्धा गर्न चाहनेहरूले पार्टीभित्र विवाद छ भनेर देखाउन खोजेको जिकिर गर्दै अव त्यो सम्भव नभएको बताउनुभयो ।
महासचिव पौडेलले मुलुकको विकासलाई तीव्रता दिन अव ठूला आयोजनाहरूको काममा ढिलाई गर्न नदिइने उल्लेख गर्दै बुटवल–सुनौली छ लेन सडक निर्माण गर्न धेरै वर्ष लागेको अनुभवबाट पाठ सिक्दै अरु आयोजनाहरु तीव्रताका साथ अगाडि बढाइने दावी गर्नुभयो ।
कार्यक्रममा प्रदेश पाँच सरकारका उद्योग, पर्यटन, वन तथा वातावरणमन्त्री लिला गिरीले सरकारका कामकारबाहीलाई रचनात्मक ढङ्गले आलोचना गर्नुपर्नेमा जोड दिँदै उहाँले तथ्यमा आधारित रहेर खबरदारी गर्न आग्रह गर्नुभयो ।
प्रदेशसभा सदस्य दधिराम न्यौपानेले जनआन्दोलन, शान्ति र समृद्धिको एजेण्डामा सञ्चारमाध्यमले खेलेको भूमिका महत्वपूर्ण रहेको चर्चा गर्दै मुलुकको शान्ति र समृद्धिमा थप भूमिका खेल्न आग्रह गर्नुभयो ।
प्रकाशित मिति: सोमबार, माघ २८, २०७५
