काठमाडौँ । प्रधानमन्त्री पुष्पकमल दाहाल ‘प्रचण्ड’ ले नेपाल र चीनबीच विश्वासको वातावरण सुदृढ गर्न आफ्नो भ्रमण उपलब्धिमूलक भएको बताउनुभएको छ ।
चीनको औपचारिक भ्रमण पूरा गरी आज स्वदेश फर्किनुभएका प्रधानमन्त्री प्रचण्डले त्रिभुवन अन्तर्राष्ट्रिय विमानस्थलमा सञ्चारकर्मीहरूसँग कुरा गर्दै भ्रमणका दौरान चिनियाँ राष्ट्रपति र प्रधानमन्त्रीसँग भएको छलफलबाट नेपाल–चीन सम्बन्धलाई थप उचाइ दिन मद्दत पुगेको टिप्पणी गर्नुभयो ।
विगतमा भएका समझदारीहरूको कार्यान्वयन गर्दै लैजाने प्रतिबद्धता पनि चिनियाँ राष्ट्रपति र प्रधानमन्त्रीले व्यक्त गर्नुभएको उहाँको भनाइ छ ।
कोरोना महामारी सुरु हुनुभन्दा अगाडि सञ्चालनमा रहेका नेपाल र चीनबीचका सबै नाका खोल्ने सहमति भएको पनि प्रधानमन्त्री प्रचण्डले जानकारी दिनुभयो ।
उहाँका अनुसार पोखरा क्षेत्रीय अन्तर्राष्ट्रिय विमानस्थल नियमित सञ्चालन गर्ने बारेमा पनि महत्त्वपूर्ण छलफल भएको छ ।
प्रकाशित मिति: शनिबार, असोज १३, २०८०
