काठमाडौँ । अख्तियार दुरुपयोग अनुसन्धान आयोगले जल उत्पन्न प्रकोप नियन्त्रण कार्यालय, लमही, दाङका इन्जिनियर रामबहादुर रानाभाटबिरुद्ध भ्रष्टाचार मुद्दा दायर गरेको छ ।
रानाभाटको सम्पत्तिमध्ये ३ करोड १५ लाख ८१ हजार ६६रूपैयाँ ८० पैसा बिगो कायम गरी विशेष अदालतमा भ्रष्टाचारको मुद्दा दायर गरिएको अख्तियारले जनाएको छ । राजनाभाटले सार्वजनिक सेवामा स्थायी नियुक्ति लिएको मिति २०४६ साल असार ३० गतेदेखि गएको कात्तिक ६ गतेसम्मको कमाइ र खर्चको बिश्लेषण गर्दा यो रकमको स्रोत नखुलेको पाइएको अख्तियारले जनाएको छ ।
साथै रानाभाटले सार्वजनिक सेवाको पदमा रहेर आफ्नो पदको दुरुपयोग गरी भ्रष्टाचारजन्य कार्य गरी गैरकानूनी रुपमा आर्जन गरेको सम्पत्ति श्रीमती राधा रानाभाटसमेतको नाममा जग्गाहरु खरिद, घर निर्माण, शेयर खरिद तथा बैंक खाताहरुमा रकम मौज्दात राखेको पाइएकोले बिगो जफत गर्न श्रीमतीलाई पनि प्रतिवादी कायम गरिएको अख्तियारका प्रवक्ता भोला दाहालले जानकारी दिनुभयो ।
प्रकाशित मिति: बुधबार, असोज १७, २०८०
