काठमाडौँ । काँग्रेसका केही सांसद र नेकपा एमालेको समर्थनमा केदार कार्की कोशी मुख्यमन्त्री निर्वाचित भएपछि काँग्रेस संसदीय दलको नेताबाट उद्धव थापाले राजीनामा दिनुभएको छ ।
आज एक विज्ञप्ति निकाल्दै थापाले प्रदेश सरकार निर्माणमा भएका घटनाक्रमले नैतिक रूपमा दलको नेतामा बस्न उपयुक्त नभएको उल्लेख गर्नुभएको छ ।
दलको नीति, सिद्धान्त र आदर्शप्रति प्रतिबद्ध रहेको पनि उहाँले लेख्नुभएको छ । काँग्रेसको शेखर कोइराला पक्षका नेता कार्कीले सत्ता गठबन्धन दलको निर्णयविपरित मुख्यमन्त्रीको दाबी गर्नुभएको थियो ।
आज बिहान सशरीर हाजिर गराएर हस्ताक्षर सनाखत गर्न खोज्दा गठबन्धनका आधिकारिक उम्मेदवार इन्द्र आङ्बोलगायत उहाँ पक्षका सांसद उपस्थित नभएपछि कार्कीलाई प्रदेश प्रमुख परशुराम खापुङले मुख्यमन्त्रीमा नियुक्त गर्नुभएको थियो ।
मुख्यमन्त्री कार्कीले भोलि पद तथा गोपनियताको शपथ लिने र मन्त्रीपरिषद् गठनको तयारी गर्नुभएको छ ।
प्रकाशित मिति: शनिबार, असोज २७, २०८०
-1740733196.jpg)
