काठमाडौँ । आज देशको पहाडी भूभागमा आंशिकदेखि सामान्य बदली रही बाँकी भूभागमा मौसम सामान्यतया सफा रहने भएको छ ।
मौसम पूर्वानुमान महाशाखाका अनुसार देशका पहाडी भूभागका थोरै स्थानहरूमा मेघ गर्जन र चट्याङसहित हल्कादेखि मध्यम वर्षाको सम्भावना रहेको छ ।
आज राति देशको पहाडी भूभागमा आंशिकदेखि सामान्य बदली रही बाँकी भूभागमा आंशिक बदलीदेखि मौसम सामान्यतया सफा रहनेछ ।
कोशी, बागमती र गण्डकी प्रदेशका पहाडी भूभागका एक दुई स्थानमा हल्का वर्षाको सम्भावना रहेको महाशाखाले जनाएको छ ।
पश्चिमी वायुको प्रभावका कारण भोलि र पर्सि भने देशभरमा हल्कादेखि मध्यम वर्षा हुने भएको छ ।
नेपालबाट मौसम बाहिरिनेक्रममा रहेको भए पनि पश्चिमी वायुको प्रवेश भएका कारण पानी पर्ने सम्भावना भएको मौसम पूर्वानुमान महाशाखाका वरिष्ठ मौसमविद् प्रतिभा मानन्धरले सीआईएनसँग बताउनुभयो ।
महाशाखाले धान काट्ने वा सुकाउने लगायतका काम गर्दा मौसमसम्बन्धी जानकारी लिएर मात्रै निर्णय गर्न अनुरोध गरेको छ ।
प्रकाशित मिति: आइतबार, असोज २८, २०८०