काठमाडौँ । नेपाल टी–ट्वान्टी विश्वकप क्रिकेटको एसिया छनोटको सेमिफाइनलमा प्रवेश गरेको छ । आज मलेसियालाई ६ विकेटले हराउँदै नेपाल सेमिफाइनलमा पुगेको हो ।
मलेसियाले दिएको १६६ रनको लक्ष्य नेपालले १८ ओभरमा ४ विकेट गुमाएर भेट्टाएको हो ।नेपालको जितमा कुशल मल्लले सबैभन्दा धेरै ६५ रन बनाउनुभयो । ३४ बल खेल्नुभएका कुशलले सात छक्का र दुई चौका प्रहार गर्नुभयो । यस्तै कुशल भुर्तेलले ४३ रन बनाउनुभयो ।
कुशलले २५ बलमा चार छक्का र चार चौका प्रहार गर्नुभयो । यस्तै आशिफ शेखले ३२ रन बनाउनुभयो ।
कीर्तिपुरमा टस जितेर पहिले ब्याटिङ गरेको मलेसियाले २० ओभरमा ९ विकेट गुमाएर १६५ रन बनाएको हो । मलेसियाका साहेज अजिजले ६८ रन बनाउनुभयो । नेपालका अविनाश बोहोराले चार विकेट लिनुभयो । यस्तै सन्दीप लामिछाने, रोहितकुमार पौडेल र गुल्सन झाले एक एक विकेट लिनुभयो ।
प्रकाशित मिति: मंगलबार, कात्तिक १४, २०८०, १६:१३
